Taldyqorǵanda bankke barǵan qyz qulap, omyrtqasyn syndyrdy

12 maýsymda anasy men qyzy bankke qarapaıym qarjylyq operaııa jasaý úshin barǵan, dep habarlaıdy Qandastar.kz.

Qyzmet alý kezegin kútip turǵan kezde qyz baspaldaq alańyna jaqyndap, tómenge qulap ketken. Anasynyń aıtýynsha, qorshaýlar arasyndaǵy sańylaý tym keń bolǵan, bul qaýipsizdik normalaryna saı bolmaýy múmkin.

Balany Taldyqorǵan qalasyndaǵy oblystyq balalar aýrýhanasyna jetkizgen, onda dárigerler balanyń keýde jáne bel omyrtqasy synǵanyn aıtqan.

Oqıǵadan keıin bank olarǵa tósek satyp ápergen, sonymen is bitken.

Eýrazııalyq banktiń baspasóz qyzmeti atalǵan oqıǵanyń Taldyqorǵandaǵy bank bólimshesinde bolǵanyn rastady.

«Qyzmet kórsetý zalynda ata-anasynyń qaraýynsyz qalǵan bala óz betinshe qyzmettik aımaqqa – baspaldaqqa shyǵyp, jaraqat alǵan», – delingen habarlamada.

«Bank bólimsheleri balalardyń eresekterdiń qaraýynsyz júrýine arnalmaǵan. Degenmen, osy jaǵdaıdan keıin Eýrazııalyq bank qaýipsizdik deńgeıin arttyrý jáne osyndaı jaǵdaılardyń aldyn alý úshin sharalar qabyldaýda. Bólimshe qyzmetkerleri dereý jedel járdem shaqyrǵan. Anasynyń bastapqyda aýrýhanaǵa jatqyzýdan bas tartqanyna qaramastan, dárigerlerdiń talabymen jáne bank kómegimen bala Almatydaǵy №1 Balalar aýrýhanasynda qaıta tekserilip, emdeldi», – delingen habarlamada.