تالدىقورعاندا بيۋدجەتتىڭ ميللياردتاعان قارجىسى جۇمسالعان كوتتەدج قالاشىعى قاڭىراپ تۇر

فوتو: كوللاج Sn.kz

جەتىسۋ وبلىسىنىڭ ورتالىعى تالدىقورعان قالاسىندا بيۋدجەتتىڭ ميللياردتاعان قارجىسى جۇمسالعان كوتتەدج قالاشىعىنىڭ قۇرىلىسى اياقسىز قالعان. قازىرگى ۋاقىتتا قۇرىلىس توقتاپ, نىسان قاڭىراعان كۇيدە تۇر, دەپ حابارلايدى qandastar.kz

بۇل تۋرالى پيسما پرەزيدەنتۋ تەلەگرام-ارناسى جازدى.

«تالدىقورعانداعى ميللياردتاعان اقشاسى بار كوتتەدجدەر قاۋىمى ءىرى جەمقورلىقتىڭ جەرگىلىكتى ەسكەرتكىشىنە اينالدى. قالا اكىمى ەرنات بازىل بيۋدجەت قاراجاتىنىڭ ۇرلانۋى مەن ۇيلەردى قالپىنا كەلتىرۋ جۇمىستارىنىڭ بارىسى تۋرالى ايتتى. بۇل قالاشىقتى سالۋعا باستاماشى بولعان وبلىستىڭ بۇرىنعى اكىمى اماندىق باتالوۆ, ارينە, ول دا ىستەن قالىس قالدى», — دەلىنگەن حابارلامادا.

سونداي-اق, بەينەجازبادا قۇرىلىستىڭ دۇرىس جۇرگىزىلمەگەنى, نىسان قۇلاۋدىڭ ءسال-اق الدىندا تۇرعانى دا ايتىلادى.

ۆيدەو اۆتورى ۇلكەن پلاندا العان كورىنىستە, راسىندا, كىرپىشتىڭ اراسىندا سىلاق جوق ەكەنىن بايقاۋعا بولادى. تسەللوفان ورالعان شاتىردىڭ استى دا «ۋىلدەپ تۇرعانى» بىلىنەدى. ۆيدەو ءتۇسىرۋشى ەكىنشى قاباتتىڭ ەدەنى قۇيىلعانمەن, ءبىرىنشى قاباتتىڭ استىن «توپىراقپەن ۇرىپ جاتقانىن» ايتادى.

تالدىقورعان قالاسىنىڭ اكىمى ەرنات بازىلدىڭ ايتۋىنشا, قۇرىلىس نىسانى 2013 جىلى باستالىپ, سودان كەيىن اكىمدىككە تاپسىرىلعان.

«نىساننىڭ قۇرىلىسى 2013 جىلى باستالىپ, سودان كەيىن اكىمدىككە تاپسىرىلدى. بىراق ەڭ قىزىعى ەشقانداي قۇجاتسىز, تولىق مالىمەتسىز بەرىلدى. تەك قۇرىلىس نىسانىنىڭ سۋمماسى عانا جازىلعان. بولدى. نە قۇرىلىستى قانداي كومپانيا سالعانى, نە تەحنيكالىق قۇجاتى جوق. سونىمەن قاتار قۇرىلىس ورنىندا كوپتەگەن قۇرىلىس زاتتارى ۇرلانعان. ەندى نىساندى اياقتاۋ ءۇشىن, باسقا كومپانيا قاراستىرىپ جاتىرمىز. قازىرگى ۋاقىتتا تەكسەرىس جۇرگىزىلىپ جاتىر», — دەدى اكىم.