تالعارداعى 16 جاستاعى ءجاسوسپىرىمنىڭ قازاسى: مارقۇم شەرزات بولاتتىڭ ءۇيى ورتەنىپ كەتتى

فوتو: اشىق دەرەككوز

الماتى وبلىسى, تالعار قالاسىندا ءبىر توپ بۇزاقىنىڭ قولىنان قازا تاپقان 16 جاستاعى ءجاسوسپىرىمنىڭ ءۇيى سەنبىگە قاراعان ءتۇنى ورتەنىپ كەتتى. زارداپ شەككەندەر جوق. بۇل تۋرالى Stan.kzاقپارات اگەنتتىگى حابارلايدى.

كۋاگەرلەردىڭ ايتۋىنشا, ءورت ءسوندىرۋ قىزمەتىنىڭ جەدەل ارەكەتىنە قاراماستان, ءۇي تۇگەلدەي ورتەنىپ كەتكەن.

الماتى وبلىسىنىڭ پوليتسيا دەپارتامەنتى ءورت فاكتىسىن راستادى.

«پوليتسيا بوتەننىڭ مۇلكىن قاساقانا جويۋ دەرەگى بويىنشا قىلمىستىق ءىس قوزعادى», – دەلىنگەن حابارلامادا.

تەرگەۋ اياسىندا كۋاگەرلەردەن جاۋاپ الىنىپ, بەينەباقىلاۋ كامەرالارىنىڭ جازبالارى زەرتتەلىپ جاتقانى ءتۇسىندىرىلدى.

«قازىرگى ۋاقىتتا وقيعانىڭ بارلىق ءمان-جايى مەن وقيعاعا سەبەپ بولۋى مۇمكىن سەبەپتەر انىقتالىپ جاتىر”, – دەلىنگەن حابارلامادا.

زارداپ شەككەندەر بار-جوعى ناقتىلانىپ جاتىر دەيدى.