تالعارداعى شەرزات بولاتتىڭ ءولىمى: كۇدىكتىلەردىڭ تۋىستارى شەرزاتتىڭ اكەسىن جاۋاپقا تارتۋدى سۇرادى

فوتو: stan.kz

تالعارداعى 16 جاستاعى شەرزات بولاتتىڭ ولىمىنە قاتىستى كۇدىكتى دەپ تانىلعانداردىڭ تۋىستارى شەرزاتتىڭ اكەسىن جاۋاپقا تارتۋدى سۇرايدى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

الەۋمەتتىك جەلىدە شەرزات بولاتتىڭ ولىمىنە قاتىستى ءىس بويىنشا كۇدىكتىلەردىڭ تۋىسى ەكەندەرىن ايتقان ءبىر توپ ادامنىڭ ۆيدەوۇندەۋى جاريالاندى.

“ەلىمىزدەن, حالىقىمىزدان كەشىرىم سۇرايمىز. بالالارىمىزدىڭ ارەكەتى ءۇشىن. بىراق ءادىل بولسىن. نۇرقانات تا (شەرزاتتىڭ اعاسى), قارجاۋباي دا (شەرزاتتىڭ اكەسى) جاۋاپقا تارتىلسىن. ءبىز سونى تىلەيمىز. ەكى جاقتى بىردەي قاراڭىزدار”, – دەيدى كۇدىكتىلەردىڭ تۋىستارى.

ولاردىڭ ايتۋىنشا, قارۋدى العاشقى بولىپ شەرزاتتىڭ اعاسى نۇرقانات الىپ شىققان ەكەن. سونداي-اق ولار شەرزاتتىڭ سول جەردەگى جىگىتتەردىڭ ءبىرىنىڭ جاعىن سىندىرعانىن ايتادى.

“قارۋدى ءبىرىنشى نۇرقانات كولىگىنەن الىپ شىققان. بالالارعا قاراي وق اتقان. بالالار تىنىش تۇرعان جەرىنەن شەرزات مارقۇم ءبىر بالانىڭ جاعىن سىندىردى. ويلاماعان جەردەن ۇرىپ جىبەرگەن. وزدەرى مىلتىق پەن پىشاق الىپ شىققان. سودان جىگىتتەر كوتەرىلىپ كەتكەن. كەشىرىم سۇرايمىز بالالارىمىز ءۇشىن. بىزدىكى دۇرىس ەمەس. بىراق بالالاردى ارانداتپاسا بارلىعى تىنىش شەشىلىپ, بارلىعى ۇيىنە كەتەتىن ەدى. ولار شەرزاتتى ولتىرەمىز دەپ بارعان جوق”, – دەيدى ۆيدەوۇندەۋ جولداعان ايەل.

كۇدىكتىلەردىڭ تۋىستارى بارلىعىنا دارحان ەسىمدى جىگىتتىڭ كىنالى ەكەنىن ايتادى. وقيعا ورنىنا جىگىتتەردى دارحان دەگەن جىگىت جيناعان كورىنەدى.

“كافەدە ءوز بەتىمەن وتىرعان بالالار. بارلىعى ءبىر قوڭىراۋدان باستالعان. بارلىعىن دارحان دەگەن بالا باستاعان, ول جەردە دارحاندى تانىمايتىن بالالار دا بار. ول قازىر ۇندەمەي وتىر. ول قارجاۋباي مەن نۇرقاناتتىڭ تانىسى. ءبىز دە سوڭىنا دەيىن بارامىز. دارحان دا جاۋاپقا تارتىلسىن. ويتكەنى ءبارىن شاقىرعان دارحان”, – دەيدى ولار.

ۆيدەوۇندەۋ جاساعاندار شەرزاتتىڭ اكەسىن حالىقتى دۇرلىكتىرىپ, جالعان اقپارات تاراتتى دەپ ايىپتايدى.

“قارجاۋباي باسىنان باستاپ وتىرىك ايتتى. قارجاۋباي پىشاق الىپ كەلدى مە, جىگىتشە مويىنداسىن. ءبىز بالانىڭ قىرقىنا دەيىن ۇندەمەي وتىردىق. قارجاۋبايدى دا قاماسىن. قارجاۋبايدىڭ ايەلى مە, قارىنداسى ما نۇرقانات اتقان وقتاردى جەردەن تەرىپ العان. ول دا جاۋاپكەرشىلىككە تارتىلسىن. اشىق سوت بولسا بارىنە بىردەي بولسىن. ءبىز سونى تالاپ ەتىمىز”, – دەيدى كۇدىكتىلەردىڭ تۋىستارى.

ەسكە سالساق, بۇعان دەيىن تالعاردا جاپپاي توبەلەس بولىپ, سالدارىنان 16 جاستاعى شەرزات بولات كوز جۇمعان ەدى. جانجال ءجاسوسپىرىمنىڭ وتباسى جۇمىس ىستەيتىن دۇكەندە باستالعان. ءجاسوسىپىرىمنىڭ ولىمىنەن كەيىن شەرزات بولاتتىڭ ءۇيىن بەلگىسىز بىرەۋلەر ورتەپ كەتتى. ىشكى ىستەر مينيسترلىگى شەرزاتتىڭ ولىمىنە قاتىستى 10 ادام كۇدىكتى دەپ تانىلىپ, بەس قىلمىستىق ءىس قوزعالعانىن مالىمدەدى. سونداي-اق مينيسترلىك ءجاسوسپىرىمدى ولتىردى دەپ ايىپتالعان كۇدىكتىلەر اراسىندا بۇرىن سوتتالعاندار بار ەكەنىن دە راستادى.