Talǵardaǵy Sherzat Bolattyń ólimi: Kúdiktilerdiń týystary Sherzattyń ákesin jaýapqa tartýdy surady

Foto: stan.kz

Talǵardaǵy 16 jastaǵy Sherzat Bolattyń ólimine qatysty kúdikti dep tanylǵandardyń týystary Sherzattyń ákesin jaýapqa tartýdy suraıdy. Bul týraly qandastar.kz Stan.kz aqparat agenttigine silteme jasap habarlaıdy.

Áleýmettik jelide Sherzat Bolattyń ólimine qatysty is boıynsha kúdiktilerdiń týysy ekenderin aıtqan bir top adamnyń vıdeoúndeýi jarııalandy.

“Elimizden, halyqymyzdan keshirim suraımyz. Balalarymyzdyń áreketi úshin. Biraq ádil bolsyn. Nurqanat ta (Sherzattyń aǵasy), Qarjaýbaı da (Sherzattyń ákesi) jaýapqa tartylsyn. Biz sony tileımiz. Eki jaqty birdeı qarańyzdar”, – deıdi kúdiktilerdiń týystary.

Olardyń aıtýynsha, qarýdy alǵashqy bolyp Sherzattyń aǵasy Nurqanat alyp shyqqan eken. Sondaı-aq olar Sherzattyń sol jerdegi jigitterdiń biriniń jaǵyn syndyrǵanyn aıtady.

“Qarýdy birinshi Nurqanat kóliginen alyp shyqqan. Balalarǵa qaraı oq atqan. Balalar tynysh turǵan jerinen Sherzat marqum bir balanyń jaǵyn syndyrdy. Oılamaǵan jerden uryp jibergen. О́zderi myltyq pen pyshaq alyp shyqqan. Sodan jigitter kóterilip ketken. Keshirim suraımyz balalarymyz úshin. Bizdiki durys emes. Biraq balalardy arandatpasa barlyǵy tynysh sheshilip, barlyǵy úıine ketetin edi. Olar Sherzatty óltiremiz dep barǵan joq”, – deıdi vıdeoúndeý joldaǵan áıel.

Kúdiktilerdiń týystary barlyǵyna Darhan esimdi jigittiń kináli ekenin aıtady. Oqıǵa ornyna jigitterdi Darhan degen jigit jınaǵan kórinedi.

“Kafede óz betimen otyrǵan balalar. Barlyǵy bir qońyraýdan bastalǵan. Barlyǵyn Darhan degen bala bastaǵan, ol jerde Darhandy tanymaıtyn balalar da bar. Ol qazir úndemeı otyr. Ol Qarjaýbaı men Nurqanattyń tanysy. biz de sońyna deıin baramyz. Darhan da jaýapqa tartylsyn. О́ıtkeni bárin shaqyrǵan Darhan”, – deıdi olar.

Vıdeoúndeý jasaǵandar Sherzattyń ákesin halyqty dúrliktirip, jalǵan aqparat taratty dep aıyptaıdy.

“Qarjaýbaı basynan bastap ótirik aıtty. Qarjaýbaı pyshaq alyp keldi me, jigitshe moıyndasyn. Biz balanyń qyrqyna deıin úndemeı otyrdyq. Qarjaýbaıdy da qamasyn. Qarjaýbaıdyń áıeli me, qaryndasy ma Nurqanat atqan oqtardy jerden terip alǵan. Ol da jaýapkershilikke tartylsyn. Ashyq sot bolsa bárine birdeı bolsyn. Biz sony talap etimiz”, – deıdi kúdiktilerdiń týystary.

Eske salsaq, buǵan deıin Talǵarda jappaı tóbeles bolyp, saldarynan 16 jastaǵy Sherzat Bolat kóz jumǵan edi. Janjal jasóspirimniń otbasy jumys isteıtin dúkende bastalǵan. Jasósipirimniń óliminen keıin Sherzat Bolattyń úıin belgisiz bireýler órtep ketti. Ishki ister mınıstrligi Sherzattyń ólimine qatysty 10 adam kúdikti dep tanylyp, bes qylmystyq is qozǵalǵanyn málimdedi. Sondaı-aq mınıstrlik jasóspirimdi óltirdi dep aıyptalǵan kúdiktiler arasynda buryn sottalǵandar bar ekenin de rastady.