تالعارداعى تراگەديا. مارقۇمنىڭ اپكەسى ۇندەۋ جاساعان اقساقالدار قارالى وتباسىعا كەلمەگەنىن ايتتى

فوتو: Ulysmedia.kz

تالعارداعى توبەلەستە قازا تاپقان شەرزات بولاتتىڭ اپكەسى – مارقۇمنىڭ اكەسىنىڭ قارىنداسى پەريزات نۇرىموۆا اقساقالدار قازاعا كۇدىكتى رەتىندە قاماۋعا الىنعانداردىڭ اۋىلى «حۋتور» تۋرالى, قىلمىس الەمىنىڭ اۆتوريتەتى دەلىنگەن اۋىلداستارى حاسان قاسىمباەۆ تۋرالى بەينەۇندەۋ جاساعانشا, نەگە ءبىزدىڭ الدىمىزعا كەلمەيدى دەپ اشىنادى, دەپ حابارلايدى Qandastar.kz Ulysmedia.kz سىلتەمە جاساپ.

«اركىم ءوزىن اقتاپ الۋعا قۇقىلى. كىم اۋىلىن جامان دەسىن. ولاردا ازامات بار بولسا, ەر بار بولسا, قايعىنى ءتۇسىنىپ تۇرسا, مەنىڭ اكەمنىڭ الدىنا, باۋىرىمنىڭ الدىنا كەلەر ەدى عوي. «اۋىلىمىزدىڭ بالالارى وسىنى ىستەپ قويىپتى, ءسىز كۇتكەن ءادىل سوتتى ءبىز دە كۇتەمىز» دەپ ايتار ەدى. ۇندەۋدە سولاي ايتار ەدى, توپان سۋدىڭ تاسۋىن, قاڭتاردى ايتىپ اڭگىمە قىلماس ەدى» دەيدى پەريزات نۇرىموۆا.

ول ۆيدەوداعى اقساقالداردى بۇرىن كورمەگەنىن, ولار الدىنا كەلمەگەنىن اتاپ ءوتتى.

«ول اۋىلدا اقساقال جوق, قاتىن-قالاش بيلەي مە دەپ قالدىم. ءبىزدى اكەڭ تۇرىپ, بالاڭ جۇگىرىپ شىقپاسىن, اناڭ تۇرىپ, قىزىڭ سويلەمەسىن دەپ تاربيەلەگەن. ال ولاردا ءتۇن جامىلىپ ايەلدەرى كەلىپ, بەتىن بۇركەپ, ءجۇزىن جاسىرىپ كەلگەنى دۇرىس ەمەس. ساناسى بولسا, نەگە جارىق كەزدە كەلمەيدى. الدە ول اۋىلدىڭ اقساقالدارى اۋىلىندا تۇرىپ, اۋىلىن ماقتاۋعا عانا شاماسى جەتە مە» دەيدى ول.

بۇگىن تالعار اۋدانى رىسقۇلوۆ اۋىلىندا (بۇرىنعى حۋتور) شامامەن 60 شاقتى ادام جينالىپ, ۆيدەوۇندەۋ تاراتتى. ۆيدەوداعى اۋىل ۇلكەندەرى «اۋىلىمىز ۇيىمشىل, ال حاسان وسى اۋىلدىڭ بىرلىگىنە, تىرلىگىنە شاپقىلايدى. مەكتەپكە كومەكتەسەدى. مەشىتكە دە. شاپقىلاپ جۇرگەن جىگىتتى قارالاپ جاتىر» دەگەن.

شەرزات بولاتتىڭ ولىمىنەن كەيىن ۇستالعان كۇدىكتىلەر ءدال وسى اۋىلدىڭ بالالارى ەكەنى, ولار باسىندا وسى حاسان ەسىمدى ادام تۇرعان قىلمىستىق توپقا جاقىن ادامدار ەكەنى حابارلانعان.

تالعارداعى قاندى وقيعا

ەسكە سالا كەتەيىك, الماتى وبلىسىندا جاس جىگىتتەردىڭ توبەلەسى 16 جاستاعى ءجاسوسپىرىمنىڭ ولىمىمەن اياقتالعان. مارقۇم دۇكەندە ساۋدا جاساپ تۇرعان اكەسىمەن ەرەگەسكەن كليەنتپەن توبەلەسكەن. بۇرىن تاراعان اقپاراتتارعا قاراعاندا, كليەنت دۇكەننەن سىرا الىپ, اقشاسىن تولەمەي كەتپەك بولعان. توبەلەس سول ءۇشىن تۋىنداعان. سىرانى تەگىن الىپ كەتپەك بولعان جىگىت جاقتاستارىن شاقىرىپ, اكەسى مەن بالاسىن, تۋىس اعاسىن سوققىعا جىققان. ءبىر توپ جىگىت ءجاسوسپىرىمدى تەپكىلەپ جاتقانىن ماڭايداعى تۇرعىندار ۆيدەوعا ءتۇسىرىپ العان. 10-شى سىنىپتا وقيتىن شەرزات بولات اتا-اناسىنىڭ دۇكەنىنە كەزدەيسوق كەلگەن. سۋىق قارۋمەن كەلگەن بۇزاقىلار ەشكىمدى اياماپتى.

پروكۋراتۋرا تالعارداعى ءجاسوسپىرىمنىڭ ولىمىنە قاتىستى مالىمدەمە جاساپ, «ءادىل تەرگەۋگە كەپىلدىك بەرەمىز» دەپ اقپارات تاراتقان. الايدا تەرگەۋشىلەرگە سەنبەگەن مارقۇمنىڭ تۋعان-تۋىستارى كوشەگە شىعىپ, ادىلدىكتى تالاپ ەتتى. ولار سول ءتۇنى بولعان 13 ادامنىڭ ورنىنا 7 ادامنىڭ عانا قامالعانىنا نارازىلىق ءبىلدىردى.

قازا تاپقان ءجاسوسپىرىمنىڭ اكەسى بەينەباقىلاۋ كامەراسىنىڭ جازباسىن الدەكىمدەر ءوشىرىپ تاستاعانىن ايتقان ەدى. الايدا ءىىم ول مالىمەتتى جوققا شىعاردى. 9 قازاندا دەپۋتات نارتاي ارالباي ۇلى باس پروكۋرور بەرىك اسىلوۆقا, ىشكى ىستەر ءمينيسترى ەرجان سادەنوۆكە جانە وقۋ-اعارتۋ ءمينيسترى عاني بەيسەمباەۆقا دەپۋتاتتىق ساۋال جولداپ, 16 جاسار ازاماتتى ولتىرگەن, جاقىندارىن اياۋسىز ساباعان قىلمىسكەرلەر قاماۋعا الىنىپ, ولارعا زاڭعا سايكەس ءادىل جازا بەرىلۋى ءتيىس دەپ ماسەلە كوتەردى. ال ونىڭ ارىپتەسى ابزال قۇسپان قىلمىستىق كودەكستىڭ 201-بابىن (سوتقا دەيىنگى تەرگەپ-تەكسەرۋ دەرەكتەرiن جاريا ەتۋگە جول بەرمەۋ) وزگەرتۋ كەرەك دەپ ەسەپتەيدى. بۇل قاجەتتىلىك ونىڭ سوزىنشە, تالعارداعى ءجاسوسپىرىمنىڭ ولىمىنەن كەيىن ايقىن سەزىلگەن.

Ulysmedia.kz كۇدىكتىلەردىڭ ءبىرى تاياۋدا قىلمىستىق جاۋاپكەرشىلىككە تارتىلىپ, جازاسىن وتەۋى كەرەك بولعانىن, ەكىنشى كۇدىكتى جاۋاپكەرشىلىكتەن جالتارىپ كەتكەنىن انىقتاعان ەدى.

12 قازانعا قاراعان ءتۇنى مارقۇمنىڭ وتباسىنىڭ ءۇيى ورتەنىپ كەتتى. شەرزاتتىڭ تۋىستارى ورتتى كۇدىكتى تاراپتىڭ ارەكەتىمەن بايلانىستىرادى. قايعى ۇستىنە قايعىعا دۋشار بولعان نۇرىموۆ اۋلەتىنىڭ بيلىككە قويار ەكى-اق تالابى بار.