«تالعات ەرمەگياەۆ تۇرمەگە تۇسپەگەندە, اۋىر اتلەتيكا جاراتىن ەدى». الماس وتەشوۆ دوپينگ قابىلداعانىن مويىندادى

فوتو: اشىق دەرەككوز

اۋىر اتلەتيكادان الەم چەمپيوناتىنىڭ كۇمىس جۇلدەگەرى الماس وتەشوۆ «ۋاقىت كورسەتەدى» Youtube-جوباسىنا بەرگەن سۇحباتىندا دوپينگ قابىلداعانىن مويىندادى, – دەپ حابارلايدى Massaget.kz تىلشىسى.

بۇرىنعى سپورتشىنىڭ ايتۋىنشا, دوپينگ دەگەن ارنايى ءدارى جوق, ول گورمونالدىق پرەپاراتتار جيناعى.

«دوپينگ دەگەن ءدارى جوق. قاراپايىم اسپيرين ىشسەڭىز دە, ول دوپينگ بولىپ سانالادى. بۇل جاي عانا اتاۋى عوي. بىراق ونىڭ ىشىندە تەستوستەرون سەكىلدىسى دە بار. بىزگە وسىنىڭ ءبارىن سالادى», – دەدى ول.

سونداي-اق, ول سپورتشىلاردىڭ دوپينگ قابىلداۋىنا سالانى باسقاراتىن ءمينيستردىڭ ءوزى سەپتىگىن تيگىزەتىنىن ايتتى.

«قازاقستان ۇلتتىق دوپينگكە قارسى ورتالىعىمەن ءبىزدىڭ مينيسترلەر كەلىسەدى. ونىڭ ءبارى اقشا. بىزدە «دۆوينيك» دەگەن بار. مىسالى, مەنىڭ دۆوينيگىم ءىنىم بولدى. ولار ءبىزدى تەكسەرۋگە كەلگەندە ايدوس دەگەن ءىنىم الماس وتەشوۆ بولىپ قان, دارەتىن تاپسىرادى. ويتكەنى ول جاقتا ءبارى كەلىسىلىپ قويعان. يليا ءيليننىڭ ءوزىنىڭ اعاسى بار, ونىڭ ورنىنا اعاسى تاپسىرادى. بۇل جەردە ءبارى كوررۋپتسيا عوي», – دەدى ول.

الماس وتەشوۆ ءوزىنىڭ دوپينگ قابىلداعانىن مويىنداپ, ەگەر سپورتشى دوپينگ قابىلداماسا, مۇنداي اۋىر سالماق كوتەرە المايتىنىن ءتۇسىندىردى.

«ەگەر ءبىر جىلدان كەيىن قاڭتاردا الەم چەمپيوناتى وتەتىن بولسا, ءبىز قاڭتارعا دەيىن دوپينگ قابىلدايمىز. مەن ونى مويىندايمىن. ول جاقتا پرەپاراتتىڭ ءتۇر-ءتۇرى بار. مىسالى, تەستوستەرون پروپياناتى سەكىلدى دارىلەر. ءبارى گورمونالدى ءدارى عوي. ونىڭ ءبارىن تولىق قابىلدايمىز. ولسىز سالماق كوتەرۋ مۇمكىن ەمەس. مەن ءوزىمنىڭ تازا سالماعىم, دەنساۋلىعىممەن 200 كەلى عانا كوتەرەمىن. ءدارىنىڭ ءبارىن ىشكەننەن كەيىن تاعى 30 كەلى قوسىلادى. بىزگە قانداي ءدارى ءىشىپ, قانداي ءدارى سالىپ جاتقانىن بىلەمىز.

ول ۋاقىتتا مينيستر كوپ اۋىستى, ولاردىڭ قاتارىندا ارىستانبەك مۇحامەدي ۇلى, تالعات ەرمەگياەۆ ءبارى بولدى.

مۇنىڭ ءبارى سول مينيسترلەردىڭ تىرلىگى. بارلىق سيستەما ءبىر عوي. مىسالى, قازاقستان ۆەنگرياعا تەكسەرىسكە كەلگەندە دوپينگ تۋرالى ءبارى بىلەدى. ياعني, مينيستر تەكسەرۋگە كەلگەندەرمەن ءوزى كەلىسەدى. ويتكەنى تالعات ەرمەگياەۆقا ءبىزدىڭ جەڭىسىمىز كەرەك. بىراق ول كىسى وتە جاقسى ادام بولدى. مەن ءوزىم ول كىسىنى جاقسى كورەمىن. ەگەر ول كىسى تۇرمەگە تۇسپەگەندە ءبىز دوپينگپەن ۇستالىپ, اۋىر اتلەتيكادان كەتپەيتىن ەدىك. ويتكەنى ول تاماش ايانمەن تىكەلەي كەلىسەتىن جالعىز ادام ەدى, باسقالار كەلىسە المايتىن. تالعات ەرمەگياەۆ تۇرمەگە تۇسپەگەندە, اۋىر اتلەتيكا جاراتىن ەدى. برازيلياداعى بۇكىل التىندى ءبىز الاتىن ەدىك. تالعات ەرمەگياەۆتى قىزمەتىنەن الىپ تاستادى, ال ونىڭ ورنىنا كەلگەندەر انا جاقپەن كەلىسە المايدى», – دەدى ول.

سونىمەن قاتار, ول الەم چەمپيوناتىندا جۇلدەگەر اتانعانى ءۇشىن مەملەكەت سىيلاعان باسپانانى قايتا قايتارۋ كەرەك دەپ سانامايتىن كورىنەدى.

«يليا ءيليننىڭ دە دوپينگ قابىلداعانى وتىرىك ەمەس, ءبىز ءبارىمىز دوپينگ قابىلدادىق. ءبىز ەشكىمدى الداعان جوقپىز. دوپينگ قابىلداعانىم جاريا بولعاننان كەيىن دە ماعان سىيلانعان ءۇيدى قايتارعان جوقپىن. مەن ونى نەگە قايتارۋىم قاجەت? ءبىز ەلدىڭ تۋىن كوتەردىك قوي, مەملەكەت تە ءبىزدى پايدالاندى. بىزگە ءدارىنى قىتاي نەمەسە رەسەي اكەپ بەرگەن جوق قوي, بىزگە ونى ءوزىمىزدىڭ ۇكىمەت بەردى», – دەدى ول.