«Тальго» пойыздарының қозғалыс бағыты өзгертілді

Фото:«Жолаушылар тасымалы» АҚ

«Жолаушылар тасымалы» АҚ Астана мен Алматы қалалары арасында қатынайтын № 4/3 және № 10/9 «Тальго» пойыздарының қозғалыс бағытына өзгерістер енгізілгенін мәлімдеді, — деп хабарлайды qandastar.kz

 2025 жылдың сәуір айынан бастап бұл пойыздар Шу стансасына тоқтамай, тікелей маршрутпен қатынайтын болады.

Шу стансасы – теміржол желісіндегі тораптық маңызы бар нысан және мұнда локомотив ауыстыру жұмысы талап етіледі. Аталған өзгеріс логистиканы оңтайландыруға, сондай-ақ Астана мен Алматы арасындағы жол жүру уақытын қысқартуға бағытталған. Сонымен қатар Шу стансасында жолаушылар легінің төмендігі де ескерілген.

Шу стансасында отырғысы немесе түскісі келген жолаушылар үшін балама бағыттар қарастырылған. Бұл бағыттарда стандартты вагондардан құралған әлеуметтік маңызы бар пойыздар, сондай-ақ келесі «Тальго» құрамдары қатынайды:

Астана мен Шу арасындағы пойыздар:

• № 72/71 «Астана – Шымкент»

• № 86/85 «Астана – Шымкент»

Шу мен Алматы арасындағы пойыздар:

• № 1/2 «Ташкент – Алматы»

• № 11/12 «Шымкент – Алматы»

• № 25/26 «Шымкент – Алматы»

• № 27/28 «Орал – Алматы»

«Жолаушылар тасымалы» АҚ жолаушылардан енгізілген өзгерістерге түсіністікпен қарауды және келтірілген қолайсыздықтар үшін кешірім сұрайды, — делінген хабарламада.