«تاماق پەن تەمەكى اكەلمەسە, ۇيگە كىرگىزبەگەن»: اتىراۋلىق انا بالالارىنان ايىرىلۋى مۇمكىن

فوتو t.me/atyrauoill

اتىراۋ وبلىسىندا 14 جاستاعى ءجاسوسپىرىم مەن ونىڭ ءۇش جاسار قارىنداسىنا قاتىستى وقيعا قوعام نازارىن اۋداردى, دەپ حابارلايدى qandastar.kz

الەۋمەتتىك جەلىلەردە تاراعان بەينەجازبالاردا ءجاسوسپىرىمنىڭ ۇيىنە كىرە الماي, سىرتتا جۇرگەن ساتتەرى كورسەتىلگەن. كۋاگەرلەردىڭ ايتۋىنشا, بالا اتا-اناسىنىڭ تالابىمەن ۇيگە ازىق-ت ۇلىك پەن تەمەكى اكەلۋگە ءماجبۇر بولعان.

وسى وتباسىندا ءۇش جاسار قىز بالا دا تۇرادى. كورشىلەردىڭ سوزىنە قاراعاندا, ولاردىڭ اناسى ىشىمدىككە اۋەس, ال اعاسى تۇراقتى جۇمىسى جوق. ۇيگە ءجيى ماس كۇيىندە بوتەن ادامدار كەلىپ, بالالار اتا-انانىڭ قاراۋىنسىز قالادى ەكەن.

اتىراۋ وبلىستىق پوليتسيا دەپارتامەنتى بۇل جاعدايعا قاتىستى تۇسىنىكتەمە بەرىپ, ەكى بالانىڭ قاۋىپسىزدىگى ءۇشىن ولاردى وتباسىنان الىپ كەتكەنىن راستادى.

– 14 جاستاعى ءجاسوسپىرىم كامەلەتكە تولماعانداردى بەيىمدەۋ ورتالىعىنا ورنالاستىرىلدى, ال ءۇش جاسار قارىنداسى سابيلەر ۇيىنە تاپسىرىلدى. اتا-اناسى بالالارعا قاجەتتى كۇتىم مەن قاۋىپسىزدىكتى قامتاماسىز ەتپەگەن, – دەپ حابارلادى ۆەدومستۆو.

پوليتسيا وكىلدەرى, بۇعان قوسا, ءبىر جىل بۇرىن دا وسى وتباسىنىڭ اتا-انا جاۋاپكەرشىلىگىن ورىنداماعانى ءۇشىن اكىمشىلىك جاۋاپكەرشىلىككە تارتىلعانىن مالىمدەدى.

قازىرگى ۋاقىتتا ءىس ماتەريالدارى كامەلەتكە تولماعاندار ءىسى جونىندەگى كوميسسيانىڭ قاراۋىنا جىبەرىلدى. كوميسسيا وتىرىسىندا بالانىڭ اناسىن اتا-انا قۇقىعىنان ايىرۋ ماسەلەسى قارالاتىن بولادى.