NEET جاستارى
تانىمال كاسىپكەرمەن اتىراۋدا كەزدەسۋ ءوتتى
اقپارات جانە قوعامدىق دامۋ مينيسترلىگى مەن ازاماتتىق باستامالاردى قولداۋ ورتالىعىنىڭ قولداۋىمەن «ادىرنا» قق اتىراۋ قالاسىندا «جاس كەلسە ىسكە…» تاقىرىبىندا ساراپتامالىق پىكىرتالاس وتكىزدى.
![](https://qandastar.kz/wp-content/uploads/2022/10/يزوبراجەنيە_2022-10-03_220557934-720x405.png)
ءىس-شارانىڭ ماقساتى كوتەرىلەتىن ماسەلەلەر ارقىلى جاستاردى بولاشاق ومىرلىك جوسپارلارىنا ىنتالاندىرۋ جانە شىعارماشىلىق الەۋەتتى دامىتۋ.
پىكىرتالاسقا ايماقتاعى تانىمال بلوگەر, اكترە, كاسىپكەر ەرنار ساكۋپوۆ قاتىسىپ ءوزىنىڭ جەتىستىككە جەتۋ جولىن ايتىپ, قاتىسۋشى جاستار اراسىندا تالقىلاۋ جۇرگىزدى.
«مەن اۋەلى ءوزىمنىڭ العاشقى ۇلكەن قادامدارىمدى كۆن-نەن باستادىم. كوپىشىلىگى سەكىلدى اۋەلى تەلەديداردا ءازىل ويناپ, كورەرمەننىڭ كوزايىمىنا اينالا باستادىق. ارتىنشا اكتەرلىك سالاعا ءتۇسىپ, بۇگىندە بىرنەشە كينولاردا بوي كورسەتتىم. قازىرگى تاڭدا جەكە يميدج قالىپتاسۋ ۇستىندە. سونىڭ ارقاسىندا كاسىپ اشىپ, جاڭا جولدى باعىندىرۋدامىن. ياعني, بۇل ارقىلى نە ايتقىم كەلەدى. ەڭبەك ەتۋدەن جالىقپاۋ كەرەك. سەبەبى, سەنىڭ قاي ءبىر ءىسىڭ بولماسىن تۇبىندە جەتىستىكككە جەتەلەيدى. ول — ءسوزسىز» دەدى ەرنار ساكۋپوۆ جاستارعا ايتقان سوزىندە.
ودان بولەك كەزدەسۋ بارىسىندا بۇگىنگى كۇنى ەڭبەك نارىعىنداعى قاجەتتى ماماندىقتار جانە قاي سالانى بەلسەندى دامىتۋ كەرەك, جاستاردى كاسىپكەرلىك قىزمەتكە وقىتۋ, كاسىپكەردىڭ قاجەتتى داعدىلارى, جاستارعا بەرىلگەن مۇمكىندىك پەن سونى قالاي دۇرىس پايدالانۋ كەرەكتىگى جايىندا ءسوز بولدى.
قاتىسۋشى جاستار بلوگەرگە سۇراقتار قويىپ, قازىرگى تاڭدا ينستاگرام ارقىلى قالاي دامۋعا بولاتىنى جايلى سۇرادى. ەرنار مىرزا ولارعا جاڭا يدەيالار جاساپ, ەشكىم شىعارماعان دۇنيەنى ويلاپ تابا الساڭ راسىمەن جەتىستىككە جەتۋ قيىن ەمەس ەكەندىگىن ايتتى.