جاڭالىقتار
تانىمال پاراسپورتشى سەۆدا اليەۆا تۇرمىسقا شىقتى
32 جاستاعى سپورت شەبەرى, وق اتۋدان سپورت شەبەرى جانە پارابيدەن الەم چەمپيونى سەۆدا اليەۆا ومىرىندەگى ماڭىزدى قادام جاسادى. ول Instagram پاراقشاسىندا سۇيىكتىسى, امەريكالىق يسااك سايەدتىڭ (Isaac Syed) ۇسىنىسىن قابىل العانىن جاريالادى, دەپ حابارلايدى Qandastar.kz
جەلى جازبالارىنا قاراعاندا, جاس جۇپ شامامەن ءبىر جىلدان بەرى بىرگە. 26 تامىزدا سپورتشىنىڭ ۇزاتۋ تويىنان تۇسىرىلگەن سۋرەتتەر ستوريستەردە تارادى. سالتاناتتى شارا مەيرامحانادا تۋىستارى مەن جاقىندارىنىڭ ورتاسىندا ءوتتى. جاس جۇبايلار ءان شىرقاپ, بي بيلەپ, ىستىق ىقىلاسقا بولەندى. كەش قوناقتارىنىڭ اراسىندا انشىلەر Amre مەن قازىبەك قۇرايىش تا بولىپ, تانىمال اندەرىن ورىندادى.
سەۆدا اليەۆا تەك سپورتتاعى جەتىستىكتەرىمەن عانا ەمەس, ساحناداعى تالانتىمەن دە تانىمال. ول «Qazaqstan» تەلەارناسىنداعى «ەكى جۇلدىز» جوباسىنا قاتىسىپ, كورەرمەن ىقىلاسىنا بولەنگەن ەدى.
ايتا كەتەيىك, اليەۆا 2023 جىلى يتاليادا وتكەن پارابيدەن الەم چەمپيونى اتاندى. 2024 جىلى وق اتۋدان قازاقستان چەمپيونى بولدى. سونداي-اق, پاريجدەگى پاراليمپيادا ويىندارىندا قازاقستان تۋىن كوتەرىپ شىققان ەدى. قازىر ول P2 ساناتىندا – 10 مەتر قاشىقتىقتاعى پنەۆماتيكالىق تاپانشادان جارىسقا قاتىسادى.
