تانىمال جۋرناليست نازارباەۆتىڭ ەكس-قۇداسىنا ەسكەرتكىش قويۋدى ۇسىندى

فوتو: پروسپورت.كز

جۋرناليست جانە فۋتبول ساراپشىسى ايدىن قوجاحمەت قىزىق مالىمدەمە جاسادى. ول قايرات بورانباەۆتىڭ قازاقستاندىق فۋتبولدى دامىتۋعا قوسقان ۇلەسىن جوعارى باعالاپ, وعان ەسكەرتكىش قويۋ كەرەگىن ايتتى, دەپ حابارلايدى qandastar.kz Offside.kz-كە سىلتەپ.

«ەگەر ساياسي جانە باسقا دا قىرلارىن الىپ تاستاپ, تەك فۋتبول تۋرالى ايتاتىن بولساق, ونىڭ سىڭىرگەن ەڭبەكتەرى ءۇشىن مەن قازىر-اق وعان كوزى تىرىسىندە ەسكەرتكىش قويۋعا داۋىس بەرەر ەدىم. قازاقستان فۋتبولىنا مۇنداي ۇلەس قوسقان ەشكىم جوق», – دەيدى قوجاحمەت.

قوجاحمەت بورانباەۆتىڭ «قايرات» فۋتبول كلۋبىندا قۇرعان ينفراقۇرىلىم دەڭگەيىن ەرەكشە اتاپ ءوتتى. ونىڭ ايتۋىنشا, كلۋب بازاسى مەن «قايرات» اكادەمياسى وزگە كلۋبتار ءۇشىن ۇلگى بولا الادى.

«مەن «قايرات» بازاسىندا ەكى اي تۇردىم. بۇل – فانتاستيكا! ەۋروپادا مۇنداي سۋپەر جابدىقتالعان بازالار وتە از. «قايرات» اكادەمياسى – ەرەكشە دۇنيە. ەندى ناتيجەلەرىنە قاراڭىز: دوستان ساتپاەۆ «چەلسيگە» اۋىستى, نۇرالى ءالىپ «زەنيتتە» ويناپ ءجۇر. بۇلاردىڭ بارلىعى – اكادەميا تۇلەكتەرى», – دەدى ول.

قوجاحمەت, سونىمەن قاتار, بورانباەۆتىڭ كلۋبتىڭ تۇراقتى قارجىلىق مودەلىن قۇرۋداعى جەتىستىكتەرى بارىن ايتتى.

قوجاحمەتتىڭ پىكىرىنشە, بورانباەۆتىڭ تاجىريبەسى مەن قۇرعان قۇرىلىمى باسقا قازاقستاندىق كلۋبتارعا ۇلگى بولۋى كەرەك, سەبەبى «قايرات» ەلدەگى وزدىگىنەن جۇمىس ىستەي الاتىن جالعىز كلۋب بولىپ قالىپ وتىر.

ايتا كەتەيىك, 2023 جىلى قايرات بورانباەۆ اسا ءىرى مولشەردە مەملەكەت قاراجاتىن ۇرلادى جانە قىلمىستىق كىرىستەردى زاڭداستىردى دەگەن كۇدىكپەن ۇستالدى. تەرگەۋ دەرەكتەرى بويىنشا, 2019 جىلى ول ءوز يەلىگىندەگى «ازياگاز شونجى» جشس ارقىلى گاز جەتكىزۋ كەزىندە QazaqGaz ۇلتتىق كومپانياسىنىڭ قاراجاتىن جىمقىردى, كەيىننەن ۇرلانعان 14,5 ملرد تەڭگە مولشەرىندەگى قاراجات زاڭدى كاسىپكەرلىك قىزمەتتەن الىنعان قۇساپ ديۆيدەندتەردى ءبولۋ جانە تولەۋ تۇرىندە زاڭداستىرىلعان.

«تەرگەۋ بارىسىندا كەلتىرىلگەن زالال تولىق كولەمدە وتەلدى», دەلىنگەن قما حابارلاماسىندا.

اگەنتتىك زاڭسىز كىرىستەر ەسەبىنەن ساتىپ الىنعان شەتەلدىك اكتيۆتەردى بەلگىلەۋ جانە بۇعاتتاۋ جۇمىستارىن جۇرگىزىپ جاتقانى دا ايتىلدى.

كەيىننەن ول كوپتەگەن اكتيۆىن مەملەكەتكە قايتارا باستادى.

مىسالى بىلتىر قاراشادا قايرات بورانباەۆپەن بايلانىستى قاراعاندىداعى فارماتسەۆتيكالىق زاۋىت بيۋدجەتكە 105 ميلليون تەڭگەنى قايتاردى. بۇل اقشا بۇرىن «سپۋتنيك V» ۆاكتسيناسىنىڭ پايدالانىلماعان دوزالارى ءۇشىن بولىنگەن