تانىمال زىلتەمىرشى الماس وتەشوۆ كۇزەتشى بولىپ ءجۇر

فوتو: اشىق دەرەككوز

كەزىندە اتى دۇركىرەپ تۇرعان وتاندىق زىلتەمىرشىلەردىڭ ءبىرى الماس وتەشوۆ بۇگىندە الماتىدا كۇزەتشى قىزمەتىن اتقارىپ ءجۇر, دەپ جازادى Qandastar.kz. بۇل تۋرالى سپورتشىنىڭ ءوزى «ۋاقىت كورسەتەدى» YouTube ارناسىنا بەرگەن سۇحباتىندا ايتتى.

الەم چەمپيوناتىنىڭ كۇمىس جۇلدەگەرى ەشكىمگە كەرەك بولماي قالعانى وكىنىشتى دەپ وتىر. ءومىرىن دە, دەنساۋلىعىن دا سۇيىكتى سپورتىنا ارناعان ول تالاي قيىندىقتى باسىنان وتكىزگەن.

«قازاقتا «ەر جىگىتتىڭ باسىنا نەلەر كەلىپ كەتپەيدى» دەيدى عوي. قازىر سونداي قيىندىقتى باستان كەشىرىپ جاتىرمىن.

مەنىڭ تۇسىنبەيتىنىم, بەلگىلى ءبىر دارەجەگە جەتىپ كوتەرىلسەڭ, ءبارى قولپاشتايدى. قاتەلىككە بوي الدىرىپ, سۇرىنسەڭ, ءبارى سەنى جەك كورىپ كەتەدى. وسىنى تۇسىنە الماي-اق قويدىم. قولىمنان كەلگەننىڭ ءبارىن ىستەدىم. 230 كەلى سالماقتى ء(بىر بۇقا) باسىڭنان اسىرىپ كوتەرە سالۋ دەگەن وڭاي ەمەس. سونى كوتەردىك. قازىر ومىرتقامنىڭ ءتورت جەرىنەن گرىجام بار. نە ايتامىن, قازاعىمدى جاقسى كورەمىن, قازاق بولىپ تۋعانىما ماقتانامىن. بىراق سۇرىنسەڭ, ەشكىمگە كەرەك بولماي قالادى ەكەنسىڭ. سول قورلىققا شىداماي ۆلاديمير سەدوۆ ءوز-وزىنە قول جۇمسادى. البەرت ليندەر دە ارامىزدان ەرتە كەتتى. كەزىندە ۇكىمەت ءبىزدى پايدالاندى. تۋدى كوتەردىك. ودان كەيىن ەشكىم بولماي قالدىق. ومىرتقادان ومىرتقا, تىزەدەن تىزە قالمادى», – دەدى سپورتشى.

ارينە, اۋىر اتلەتتەردىڭ سوڭعى كەزدەرى وسىنداي حالگە تۇسۋىنە دوپينگ داۋى اسەر ەتكەنى جاسىرىن ەمەس. ول سپورتشىلاردىڭ دوپينگ ىشەتىنى راس ەكەنىن, وعان سپورت سالاسىنداعى باسشىلاردىڭ وزدەرى مۇددەلى ەكەنىن ايتتى.

«پروپيونات, تەستوستەرون, ستانوزولول سياقتى گارمونالدى پرەپاراتتاردىڭ ءبارىن ىشتىك. ونى ىشپەسەڭ كوتەرە المايسىڭ. تازا اعزام 200 كەلىدەن ارتىق كوتەرۋگە شاماسى جەتپەيدى. دوپينگتىڭ كومەگىمەن 230 كەلىگە دەيىن بولادى», – دەيدى الماس وتەشوۆ.

ول سونىمەن قاتار دوسى يليا يلين دە ءوزى دە حالىقتى الداعان جوقپىز دەپ وتىر.

«ءدارى-دارمەكتىڭ ءبارىن ءوزىمىز جايدان-جاي ىشپەيمىز. بىزدە مەديتسينالىق شتاب, باس باپكەر, اعا باپكەر بار, سولار بەرەدى», – دەيدى سپورتشى.

اۋىر اتلەت ەشقانداي وتەماقى المايتىنىن دا العا تارتتى.

«ەشقانداي وتەماقى جوق. قازىر الماتىدا كۇزەتشى بولىپ جۇمىس ىستەيمىن», – دەدى وتەشوۆ.

زىلتەمىرشى سپورت مەكتەپتەرىنە جۇمىسقا شاقىرسا, بىلەك سىبانا كىرىسۋگە دە دايىن ەكەنىن ايتتى. بىراق ازىرگە ونداي ۇسىنىس جوق ەكەن.