تارازدا 500-دەن استام ءورت گيدرانتى جارامسىز كۇيدە تۇر

ءبىر جاعداي بولا قالسا, ونىڭ 500-ىنەن سۋ الۋ قيىن. كەيبىرى بۇزىلعان. جارتىسىنا جۋىعى جول جوندەۋ جۇمىستارى كەزىندە بىتەلىپ, نە ورنىنان جىلجىپ كەتكەن. ال ەل كوپ جۇرەتىن بازارلاردا گيدرانت دەگەن اتىمەن جوق.

بليتس: – پوجارنىە رۋكاۆا جالعاۋ ءۇشىن دوستۋپ جوق بىزدە, بىرىنشىدەن. ەكىنشىدەن, مىناۋ كوتەرىلىپ تۇرۋ كەرەك. مىنا شەتىنە تىرەلىپ قالادى, بۇراعانعا كەلمەيدى. وتە ىڭعايسىز. نەگىزى وسىلاي تۇرۋ كەرەك قوي. جەردەن شىعىپ بۇراعان كەزدە وسىلاي بۇرالۋ كەرەك. سوڭعى جىلدارى قالا كوشەلەرى جاڭارىپ ينفراقۇرىلىم جاقسارعانىمەن, ءورت قاۋىپسىزدىگىنە ءمان بەرىلمەي تۇر.

سەبەبى جول سالعان قۇرىلىس كومپانيالارى گيدرانتاردى بىتەپ, نە ورنىن اۋىستىرىپ جىبەرگەن. ماسەلەن قالا اۋماعىندا 2250 ءورت قاۋىپسىزدىگى قۇرالدارى بولسا, ونىڭ 529-ى جارامسىز. ەربول ءامىروۆ, تاراز قالالىق تجب باستىعى: – بۇل گيدرانتتار پايدالانۋعا بەرىلگەن كەزدە شتوكتارى جىلجىپ كەتەدى, جاڭاعى ليۋكتارى جوق بولىپ, الىپ كەتەدى. قوقىستارعا تولىپ كەتەدى. ءبىزدىڭ تاراپىمىزدان جينالىستا دا قارالادى. جالپى اقپاراتتىق حاتتار دا جولدانادى. بىراق بۇل جۇمىستار كىشكەنە باياۋ جۇرگىزىلۋدە.

مەرەي باەت, ءتىلشى: – شاھارداعى بازارلاردا تج تالاپتارى مۇلدەم ساقتالماعان دەۋگە بولادى. ماسەلەن ءبىز تۇرعان اۋماقتا 5 بازار بولسا, ونىڭ تەك بىرەۋىندە عانا سۋ گيدرانتتارى بار. ال مىنا «ومار اتا» دەپ اتالاتىن ساۋدا ورنىندا وسىدان 2 اي بۇرىن ءورت بولعان. جالىن 350 شارشى مەتر اۋماقتى جالماپ كەتتى. تجد ماماندارى جاقىن ارالىقتا سۋ بولماعان سەبەپتى جالىنمەن 5 ساعات بويى ارپالىسقان.

توتەنشەلىكتەر حالىق كوپ شوعىرلانعان الەۋمەتتىك نىسانداردا سۋ قۇرىلعىلارى مىندەتتى تۇردە بولۋ كەرەك دەيدى. بىراق وعان قۇلاق اسىپ جاتقان كاسىپكەرلەر شامالى. بازار باسشىلارى گيدرانتتى اكىمدىك ورناتسىن دەسە, قالا بيلىگى بۇل كاسىپكەردىڭ تىكەلەي جاۋاپكەرشىلىگى, دەپ مالىمدەدى. قايرات يسمايل, تاراز قالاسى اكىمىنىڭ ورىنباسارى: – وزدەرى جۇرگىزۋ قاجەت.

مىناۋ ورتالىق ماگيسترالدى جەلىلەردەن سەرۆيستىك جەلىلەردى تارتۋ, ونىڭ ىشىندە مەنشىك نىسانى, ياعني, جەكە نىسان بولعاننان كەيىن ونىڭ ءوزىنىڭ ىشىندە جۇرگىزىلەتىن جۇمىستارىنىڭ ءبارى سول مەنشىك يەسى ەسەبىنەن قامتىلۋ كەرەك. ال قالاداعى جارامسىز 529 گيدرانتتىڭ ماسەلەسى بيىل تولىقتاي شەشىلەدى. سۋ قۇرىلعىلارىنىڭ جاڭاسىن ساتىپ الۋ ءۇشىن اكىمدىك 35 ملن 845 مىڭ تەڭگە بولگەن. ەندى ولاردى ورناتۋ ءۇشىن قوسىمشا 17 ميلليون تەڭگە قاراستىرىپ وتىر. «بۇل جۇمىستار قىركۇيەك ايىنا دەيىن اياقتالادى», – دەيدى قالا اكىمىنىڭ ورىنباسارى.