Tarazda kópbalaly ana sotta 5 bankti jeńip shyqty

Foto: istockphoto.com

Tarazda bes bankten 6 mln teńgeniń dúnıesin nesıege alǵan áıel ony tóleı almaı, sotqa júgingen, dep habarlady qandastar.kz

Sottyń aqparatynsha, áıeldiń kámelet jasyna tolmaǵan tórt balasy bar. Joldasymen zańdy neke qıdyrmaǵan. О́zi jergilikti JShS-lardyń birinde operator bolyp jumys isteıdi.

«Áıeldiń jalaqysy 220 myń teńge, al aı saıynǵy nesıesiniń tólemi 395 myń teńge bolǵan. Ol bes bankten alty mıllıon teńge qaryz alǵan», — dep habarlaıdy sot.

Jalaqysy aı saıynǵy tóleminen eki esedeı az áıel aı saıynǵy tólemin azaıtý úshin bankterge ótinish jasaǵan. Alaıda olar bas tartqan kórinedi. Sondyqtan, áıel sotqa júgingen.

«Talap aryzynda ol nesıelik júktemeniń shamadan tys ekenin kórsetip, aı saıynǵy tólemderdi azaıta otyryp, qaryzdy óteý merzimin 60 aıǵa deıin uzartýdy suraǵan. Bes kredıtordyń tórteýi talap qoıýdy qanaǵattandyrýǵa qarsy bolǵan. Alaıda, Taraz qalalyq soty talap qoıýshynyń ýájderi is materıaldarymen tolyqtaı rastalǵan, onyń áreketinde aram pıǵyldyń belgileri joq degen qorytyndyǵa kelgen. Sot áıeldiń talabyn qanaǵattandyryp, tólem qabilettiligin qalpyna keltirý tártibin qoldandy, oǵan sáıkes qaryz 5 jyl boıy aı saıyn óteledi», — dep habarlaıdy sot.

turkystan.kz jazǵandaı, sot sheshimine eki kredıtor bank tarapynan shaǵym túsiripti. Alaıda, Jambyl oblystyq soty sheshimdi ózgerissiz qaldyrdy.