تارازداعى تەرگەۋ يزولياتورىندا 73 جاستاعى قاريا قايتىس بولدى

73 جاستاعى قاريا بيىل مامىر ايىندا پارا بەرگەنى ءۇشىن سوتتالعان, دەپ جازادى Qandastar.kz جۋرناليست ميحايل كوزاچكوۆتىڭ Telegram-ارناسىنا سىلتەمە جاساپ.

«تارازداعى تەرگەۋ يزولياتورىندا قاماۋدا بولعان ەر ادام اياقاستى قايتىس بولدى. ونىڭ ءولىمى بەينەباقىلاۋ كامەراسىنا تىركەلگەن. مارقۇم جۇرەك اۋرۋىنا بايلانىستى مەديتسينالىق مەكەمەدە تىركەۋدە تۇرعان. بۇعان دەيىن بىرنەشە رەت اۋرۋحاناعا جەتكىزىلىپ, ەم-دوم قابىلداعان. الدىن الا مالىمەت بويىنشا, ونىڭ ولىمىنە جۇرەك اۋرۋى سەبەپ بولعان», – دەلىنگەن جامبىل وبلىسى بويىنشا قىلمىستىق-اتقارۋ جۇيەسى دەپارتامەنتى تاراتقان حابارلامادا.

سوتتالعان ەر ادام اپەللياتسيالىق شاعىمنىڭ قارالۋىن كۇتكەن. تۋىستارىنىڭ ايتۋىنشا, سوت وتىرىسى بىرنەشە رەت كەيىنگە قالدىرىلعان. Cوڭعى رەت 30 شىلدەدە شەگەرىلىپ, 13 تامىزعا بەلگىلەنگەن.

قارت ادامنىڭ دەنساۋلىعىنا بايلانىستى تۋىستارى بۇرىننان الاڭداۋشىلىق ءبىلدىرىپ كەلگەن. وعان كۇن سايىن شۇعىل مەديتسينالىق كومەك قاجەت بولعان. دارىگەرلەر وعان جۇرەك جەتىسپەۋشىلىگى, جۇرەك دەمىكپەسى مەن قانت ديابەتى دياگنوزىن قويعان.

ول ءىى توپتاعى مۇگەدەك بولعان ءارى جۇرەگىنە كارديوستيمۋلياتور ورناتىلعان. سوت-مەديتسينالىق ساراپتامالاردىڭ قورىتىندىسى بويىنشا, ونىڭ دياگنوزدارى جازاسىن وتەۋدەن بوساتۋعا نەگىز بولا الاتىن اۋرۋلار قاتارىنا جاتادى.