تارازدىق مۇعالىم تانىمال 3 قازاقستاندىق TikTok-كرەاتور قاتارىنا ەندى

تارازداعى نازارباەۆ زياتكەرلىك مەكتەبىنىڭ فيزيكا ءپانى مۇعالىمى ميرلان جۋسامباەۆ ورتالىق ازياداعى TikTok وكىلدىگى ءبىلىم سالاسىندا كونتەنت جاساۋشىلار اراسىندا ۇيىمداستىرعان بايقاۋدىڭ باستى نوميناتسياسىنا يە بولدى.

سالتاناتتى شارا ءتۇرلى سالادا جەتىستىككە جەتكەن تۇلعالاردىڭ قۇندى ويلارى مەن ويلى باياندامالارىنا تولى بولدى. سونىمەن بىرگە جىلدىڭ ەڭ جارقىن كرەاتورلارى ماراپاتتالدى. قازىر TikTok جەلىسىندە ءبىلىم بەرۋ كونتەنتىن ۇسىنۋ قازاقستاندا بەلسەندى دامىپ كەلەدى. ال بۇل ماراپاتتى تاجىريبەلى پەداگوگ ءوز ماتەريالدارىنىڭ جوعارى ساپاسى مەن فيزيكانى تەرەڭدەتىپ وقىتۋدىڭ ءارتۇرلى ادىستەرىن قولجەتىمدى ءارى قىزىقتى ەتىپ تاراتقانى ءۇشىن الىپ وتىر. ونىڭ TikTok (@physicsphenom) پاراقشاسىنداعى ماتەريالدار جاسوسپىرىمدەر مەن مۇعالىمدەر اراسىندا فيزيكانى ناسيحاتتاۋدىڭ جارقىن ۇلگىسى دەۋگە دە بولادى.

ميرلان تولەگەن ۇلى ءوز تاجىريبەسىمەن ءبولىسىپ, ماتەريالدارىنىڭ وقىرماندارىنا پايدالى بولعانىنا قۋاناتىنىن جەتكىزدى.

ەسكە سالايىق, ميرلان جۋسامباەۆ 2014 جىلدان باستاپ تاراز قالاسىنداعى NIS-تە فيزيكا ءپانىنىڭ مۇعالىم-ساراپشىسى بولىپ جۇمىس ىستەيدى. سونداي-اق بيىل «قازاقستان مۇعالىمى» ۇلتتىق سىيلىعىنىڭ ءفيناليسى اتاندى. CLIL (Content and Language Integrated Learning) بويىنشا سەرتيفيكاتتالعان ساراپشى رەتىندە جاراتىلىستانۋ-عىلىمي پاندەر مەن اعىلشىن ءتىلىن ينتەگراتسيالاۋ سالاسىندا زەرتتەۋلەر جۇرگىزەدى. ونىڭ زەرتتەۋ ناتيجەلەرى 2018 جىلى يتاليادا جانە 2022 جىلى ارمەنيادا وتكەن European Conference on Educational Research سياقتى حالىقارالىق كونفەرەنتسيالاردا, سونداي-اق دببۇ ۇيىمداستىرعان حالىقارالىق عىلىمي-پراكتيكالىق كونفەرەنتسياعا ۇسىنىلدى. ول – ءبىلىم بەرۋ سالاسىنداعى زەرتتەۋشىلەر قاۋىمداستىعىنىڭ (KERA) مۇشەسى.

قازىرگى ۋاقىتتا ونىڭ تانىمدىق بەينەروليكتەرى ميلليونداعان قارالىم جينايدى, وسى ارقىلى TikTok-تا عىلىمدى بەلسەندى تۇردە ناسيحاتتاۋدا.