«تاس-تالقانى شىقتى»: جۇلدىز ابدىكارىموۆا جوندەۋ جۇمىستارىنان شارشاعانىن ايتىپ اشۋلاندى

جۇلدىز ابدىكارىموۆا جەلىدەگى پاراقشاسىندا ءۇيىنىڭ جوندەۋ جۇمىستارىنا كوڭىلى تولماي جاتقاندىعىن ايتتى, دەپ حابارلايدى Qandastar.kz.

ءانشى جاقىندا عانا ۇلكەن ءۇي الىپ, جوندەۋ جۇمىستارىن باستاعانىن حابارلاعان بولاتىن.

اياعى اۋىر بولسا دا بۇل ءىستىڭ باسى-قاسىندا جۇرگەن ول اياق استىنان جوندەۋ جۇمىستارىنىڭ ويداعىداي ىسكە اسپاي جاتقانىنا كوڭىلى ءتۇستى.

«مىناۋ ءبىر رەمونتتىڭ مەن جوسپارلاعان ۋاقىتتا بىتپەيتىنىنە كوزىم جەتتى. تىم جاقسى باستالعان جوندەۋ جۇمىستارىنىڭ بۇگىن بەرەكەسى قاشىپ, كۇل-تالقانى شىققانى ما? قالايشا? قاي جەردەن قاتە كەتتى? نەنى وتكىزىپ الدىم? — دەگەن ءتۇرلى سۇراقتار تۋىندادى», — دەپ جازدى ول.

سونداي-اق, ابدىكارىموۆا  وقىرماندارىن وزدەرىنىڭ جوندەۋ جۇمىستارى كەزىندەگى وقيعالارىمەن ءبولىسۋدى دە سۇرادى.

«ويلاي بەرسەم ويدىڭ تۇبىنە ءتۇسىپ كەتەيىن دەپ تۇرمىن عوي, تاك چتو بۇگىن ەشتەڭە ويلاماي ءجاي سىزدەردىڭ قىزىق وقيعالارىڭىزدى وقيىنشى», —  دەدى ونەر يەسى.