«تاۋەلدىلىكتەن ارىلۋ ءۇشىن ادام ءولىم اۋزىنان قالۋ كەرەك»: پسيحوتەراپەۆت ويىن قۇمارلىقتان ارىلۋدىڭ ەڭ ءتيىمدى جولىن ايتتى

فوتو: ايقىن.كز

سيحوتەراپەۆت ماماندار قۇمار ويىنعا دەگەن تاۋەلدىلىككە ادامنىڭ پسيحولوگيالىق جاراقاتتارى سەبەپ بولادى دەيدى. الايدا ويىنقۇمارلىقتىڭ قانشالىقتى قاۋىپتى ەكەنىن ءتۇسىنىپ, ودان ارىلۋ ءۇشىن مامانداردىڭ كومەگىنە جۇگىنەتىندەر ازشىلىق. قۇمار ويىننىڭ قاقپانىنا ءتۇسىپ, شىرماۋىنان شىعا الماي جۇرگەندەردىڭ پسيحولوگياسىن زەردەلەپ, تىعىرىقتان شىعۋدىڭ جولدارىن قاراستىرىپ كوردىك. Stan.kz تىلشىسىنە سۇحبات بەرگەن پسيحوسوماتولوگ نۇرداۋلەت سادىبەك قۇمار ويىنعا تاۋەلدى ادامداردىڭ نەگىزگى بەلگىلەرى مەن تاۋەلدىلىكتەن قۇتىلۋدىڭ تاسىلدەرى تۋرالى ايتتى.

پسيحوتەراپەۆت ماماننىڭ كومەگىمەن “لۋدوماننىڭ نەگىزگى بەلگىلەرى قانداي? ويىن قۇمار ادام نە سەبەپتى تاۋەلدىلىگىنەن ارىلا المايدى جانە ونىڭ قالاي الدىن الۋعا بولادى?” دەگەن سۇراقتارعا جاۋاپ تاۋىپ كوردىك. قۇمار ويىنعا دەگەن تاۋەلدىلىككە تاپ بولماس ءۇشىن ونىڭ باستى بەلگىلەرى مەن ونىمەن كۇرەسۋ جولىندا جول بەرۋگە بولمايتىن قاتەلىكتەر تۋرالى ءبىلۋ ماڭىزدى. نۇراۋلەت سادىبەكتىڭ ايتۋىنشا, ويىن قۇمار ادامدار ءجيى وتىرىك ايتىپ, قيال-عاجايىپقا سەنەدى.

قۇمار ويىندارعا تاۋەلدىلىكتىڭ پسيحولوگيالىق بەلگىلەرى:

ۇتىستان جەڭەتىنى تۋرالى الدامشى وي;
ويىن كەزىندەگى نەمەسە ونىڭ الدىنداعى ەيفوريا, تولقىنىس نەمەسە ۇرەي;
ەموتسيالىق تۇراقسىزدىق;
ءوزىن كىنالى سەزىنۋ, ۇيالۋ, قاجۋ;
اشۋشاڭدىق, اگرەسسيا, ءباس تىگۋگە كەدەرگى كەلتىرگەن كەزدەگى ىرىقسىزدىق;
ماسەلەنى نەمەسە ونىڭ سالدارىن جوققا شىعارۋ جانە باعالاماۋ;
قۇمار ويىن قارجىلىق نەمەسە باسقا قيىندىقتاردى شەشۋگە كومەكتەسەدى دەگەن الدامشى ءۇمىت;
ويىنعا دەگەن قۇمارلىقتان ءلاززات الۋ.
پسيحوسوماتولوگ نۇرداۋلەت سادىبەك بالا كەزدەگى پسيحولوگيالىق جاراقاتتاردى ويىنقۇمارلىققا الىپ كەلەتىن باستى سەبەپ دەپ كورسەتتى. اتا-انا بالاعا كوڭىل اۋدارىپ ءجۇرمىن دەپ ويلاعانىمەن ءار بالانىڭ قابىلداۋى ءار ءتۇرلى ەكەنىن ەسكەرۋ قاجەت دەيدى.

ء“بىر ۇيدەن ماسكۇنەم دە, عالىم دا شىعادى. بىراق اتا-اناسى ەكەۋىنە بىردەي تاربيە بەردى. مۇندا ءار بالا وزدىگىنشە قابىلداپ تۇر. مامان بالانىڭ قابىلداۋىنداعى قاتەلىكتەردى پسيحولوگيالىق قۇرالدار ارقىلى ەمدەپ, دۇرىس قابىلداۋ شەشىمدەرىن بەرەدى. بالا كەز كەلگەن جاعدايدى باسقاشا كورەدى. ءسويتىپ بۇل جاعدايعا اكە-شەشەسىنىڭ دە, ءوزىنىڭ دە كىنالى ەمەس ەكەنىن تۇسىنەدى. وسىلايشا ول ەشكىمنەن ەشتەڭە تالاپ ەتپەيدى جانە انا-اناسىنىڭ كوڭىلىن وزىنە اۋدارۋ ءۇشىن ەشتەڭەنى شاعىپ, قيراتپايدى, ولارعا ماسىل بولمايدى. كوپ جاعدايدا ويىنقۇمار ادامداردىڭ اكەسى, اناسى, اپكەسى, ايەلى حابارلاسادى. بىراق ول ادامنىڭ ءوزى حابارلاسپايىنشا ءبىز ولارعا جاۋاپكەرشىلىك المايمىز جانە ول اداممەن جۇمىس ىستەمەيمىز. وزدەرى نيەت ءبىلىدىرىپ, ايىققىسى كەلەتىندەر دە بار. ولارمەن جۇمىس ىستەيمىز. بىراق اتالعانداردىڭ 95 پايىزى سوڭىنا دەيىن ەمدەلمەيدى, ورتا جولدان تاستاپ كەتەدى. پسيحولوگيانىڭ 5 پايىزىندا ءبىز سانالى تۇردە ءومىر سۇرەمىز, 95 پايىزىندا بەيسانالى تۇردە ءومىر سۇرەمىز. وعان ادەتتەر, رەاكتسيالار جاتادى. سانالى تۇردە ءومىر سۇرەتىن 5 پايىزدىڭ ىشىندە ەرىك-جىگەر دەگەن دۇنيە بار. ەرىك-جىگەر ادامنىڭ ىشىندەگى 95 پايىز ۇمتىلىستى توقتاتا المايدى. ادام جان دۇنيەسىن رەتتەپ, پسيحولوگيالىق جاراقاتتارىن ەمدەمەيىنشە لۋدومانيادان قۇلان-تازا ايىعا المايدى”, – دەيدى مامان.
الايدا ونىڭ ايتۋىنشا, قۇمار ويىنعا تاۋەلدىلىكتى ەمدەۋدىڭ زامانۋي ءادىس-تاسىلدەرى جوق. نۇرداۋلەت پسيحولوگياداعى ءادىس-تاسىلدەردىڭ تيىمدىلىگى, ونىڭ قالاي جۇمىس جاسايتىنىن 100 پايىزدىڭ 80 پايىزىن 1900 جىلدارى زەرتتەلىپ قويعانىن ايتادى. بۇل بەلىگىلى ءبىر الگوريتم ەكەن.

“ومىردە بالانس بار. لۋدومانيامەن اۋىراتىن ادامدار قانشالىقتى كوپ بولسا, سول دەرتتەن قاشىپ جۇرگەن ادامدار دا سونشا كوپ. مۇنىڭ بارلىعى كارتا سەكىلدى جاي ويىنداردان باستالادى. تىلەككە ويناۋ, ءباس تىگۋ دەگەندەردەن اۋلاق بولۋ كەرەك. بۇل – ازارت. ال ازارتقا كىرگەن ادامنىڭ ودان قۇتىلۋى ەكى تالاي. ول “مەن وزىمە تيەسىلى دۇنيەنى جوعالتتىم, ونى قايتارۋىم كەرەك” دەپ ويلايدى. ءتىپتى, 50, 100 تەڭگە بولسا دا ءباس تىكپەۋ كەرەك”, – دەيدى پسيحوتەراپەۆت.

“تاۋەلدىلىكتەن ارىلۋ ءۇشىن ادام ءولىم اۋزىنان قالۋ كەرەك”

قازاقستاندىق پسيحولوگتار ويىنقۇمار ادامدارعا 10 شاقتى تەراپيا وتۋگە كەڭەس بەرەدى. ال ەۋروپالىق پسيحولوگتار ءبىر پروبلەمانى 1-1,5 جىل ەمدەۋ كەرەك دەيدى. ماماننىڭ ايتۋىنشا, لۋدومانيادان قۇلان-تازا ايىعۋعا بولادى. ونىڭ قابىلداۋىنا كەلەتىن ناۋقاستار ءوز قالاۋىمەن 5-6 تەراپيا وتەدى. ءسويتىپ قۇمارويىنعا ءوزىن نە يتەرمەلەيتىنىن تۇسىنەدى. پسيحولوگيالىق جاراقاتىن ەمدەپ, باسقا شەشىم قابىلدايدى. نۇرداۋلەتتىڭ سوزىنشە, قۇمار ويىنعا تاۋەلدى ادام جان جاراسىن تۇسىنگەندە عانا ءوز قاتەلىگىن مويىنداپ, ونى قايتالامايدى.

ء“ار نارسەنىڭ ءوزىنىڭ شەگى بولادى. ديزبالانستىڭ شەگى – ەگويزمنىڭ ەڭ جوعارعى ساتىسى. ادام ول كەزدە ەشتەڭەنىڭ سالدارىن ويلامايدى. سونداي ەگويزمنىڭ ەڭ جوعارعى دارەجەسى – ادام ءوز ايەلىن دە اقشاعا تىگىپ جىبەرۋى مۇمكىن. لۋدومان مۇنى تەك دەنساۋلىعى ناشارلاعاندا نەمەسە ءولىم اۋزىنان قالعان كەزدە عانا تۇسىنەدى. وعان دەيىن ونى ۇلكەن ماسەلە دەپ قاراستىرمايدى. ول ادام بىزگە ءوز ەركىمەن ەمدەلەمىن دەپ كەلۋ ءۇشىن ونىڭ باسىنان قيىن جاعداي ءوتۋ كەرەك. ءولىم اۋزىنان قالۋى مۇمكىن دەگەندەي. كوپ جاعدايدا وعان جەڭىل-جەلپى نارسەلەر اسەر ەتپەيدى. مىسالى, ەر ادامدى تاۋعا اپارىپ, ۇرىپ-سوعىپ, سول جاققا تىر جالاڭاش قالدىرىپ كەتتى دەلىك. ادام سونداي قيىن جاعدايعا تاپ بولعاندا, ار-ۇيات ماسەلەسى قوزعالعاندا عانا “مۇمكىن مەن دۇرىس ەمەس جولدا شىعارمىن? بۇدان شىعۋدىڭ باسقا جولى بار شىعار” دەگەن وي كەلۋى ىقتيمال. وسىنداي سۇراقتار مازالاعان كەزدە عانا لۋدومان پسيحولوگ مامانعا كەلىپ ەمدەلەدى”, – نۇرداۋلەت سادىبەك.

ەلىمىزدە بيىل قاڭتار-ماۋسىم ايلارىندا قۇمار ويىن مەن ءباس تىگۋدى ۇيىمداستىرۋ سالاسىنداعى نەگىزگى كاپيتالعا سالىنعان ينۆەستيتسيالار 174,4 ملن تەڭگەگە جەتتى. بۇل كورسەتكىش بىلتىرمەن سالىستىرعاندا 41 پايىزعا تومەن. 2023 جىلى بۇل كەزەڭدە ينۆەستيتسياعا قۇيىلعان قاراجات كولەمى – 295,7 ملن ​​تەڭگە ەدى.

وڭىرلەر بويىنشا ينۆەستيتسيانىڭ باسىم بولىگى الماتى وبلىسىنا تيەسىلى – 171,6 ملن تەڭگە, اقمولا وبلىسىدا 594 مىڭ تەڭگە, الماتى قالاسىنا 2,2 ملن تەڭگە ءتۇستى.

سونىمەن قاتار, 2024 جىلدىڭ ءبىرىنشى توقسانىندا قۇمار ويىن مەن ءباس تىگۋدى ۇيىمداستىرعاندار 112,1 ملرد تەڭگەگە قىزمەت كورسەتكەن. بۇل بىلتىرمەن سالىستىرعاندا قۇندىق ماندە 9,4%-عا ارتىق. بۇل رەتتە فيزيكالىق كولەم يندەكسى 97% تەڭ. ياعني, ناقتى ماندە بۇل سەكتوردا قىزمەت كورسەتۋ كولەمى 3% تومەندەگەن.

ەلىمىزدە قۇمارويىنشىلار سانى 400 مىڭنان اسقان. ولار 2023 جىلى قۇمار ويىنعا 417 ميلليارد تەڭگەدەن استام قارجى جۇمساعان. رەسمي ەمەس دەرەكتەرگە سەنسەك, بىلتىر ەلىمىزدەگى ويىنحانالار مەن بۋكمەكەرلىك كونتورالاردىڭ تابىسى 1 تريلليونعا جۋىقتاعان.
وتكەن جىلدارعا كوز جۇگىرتسەك, 2014 جىلى قازاقستانداعى ويىن بيزنەسىنىڭ تابىسى 24 ميلليارد تەڭگەگە جەتتى. 2022 جىلى بۇل كورسەتكىش 572 ميلليارد تەڭگەگە كۇرت ءوستى. دەسە دە بىلتىر جوعارىدا كورسەتكەندەي ەكى جىلدان بەرى ويىنحالارا مەن بۋكمەكەرلىك كەڭسەلەردىڭ اينالىمى تومەندەگەن.

تاۋەلدىلىكتىڭ الدىن الۋ جولدارى قانداي?

ماماندار ويىنقۇمارلىققا, ءباس تىگۋگە دەگەن قىزىعۋشىلىق بالا كەزدەن باستالاتىنىن ايتادى. الدىن الۋ شارالارىن دا سول شاقتا قولعا الۋ كەرەك دەپ ەسەپتەيدى. سول سەبەپتى ولار ءجاسوسپىرىم شاقتا اتا-انالارعا اسا مۇقيات بولۋعا شاقىرادى.

بالالاردى تەلەفوننان شەكتەۋ كەرەك. تەلەفونى مەن قولجەتىمدى ينتەرنەتى بار بالالار مەن جاسوسپىرىمدەردىڭ ەلىكتەۋى دە, ءار نارسەگە سەنۋى دە وڭاي;
سونداي-اق, بۇعاناسى قاتپاعان, ءالى قالىپتاسا قويماعان جاسوسپىرىمدەرگە نەنىڭ دۇرىس, نەنىڭ بۇرىس ەكەنىن تۇسىندىرگەن ابزال. ءتۇسىندىرۋ دەگەن ۇرىپ-سوعۋ, ۇرىسۋ, زەكۋ ەمەس. ونىمەن ءوز دارەجەسىندە سويلەسىپ, ءتىل تابىسۋعا تىرىسىپ كورگەن ءجون. سوندا ويى بۇزىلىپ جۇرگەن بالا ارقا سۇيەپ, سەنەتىن ادامنىڭ بارىن ءبىلىپ, ءوزىن نە مازالاپ جۇرگەنىن, نەنى قالايتىنىن اشىق ايتۋى مۇمكىن;
لۋدومانياعا دەگەن قىزىعۋشىلىق بالا شاقتان باستالاتىندىقتان اتا-انا ءجاسوسپىرىمنىڭ ارالاساتىن ورتاسىن ءمان بەرگەن دۇرىس. بالاعا قاجەت كەزدە قولداۋ كورسەتىپ, دەمەپ وتىرعان دا دۇرىس.
قازاقستاندىقتار قۇمار ويىننىڭ قۇرىعىنا تۇسپەس ءۇشىن مەملەكەت تاراپىنان دا بىرقاتار شارالار جاسالۋدا. دەنساۋلىق ساقتاۋ مينيسترلىگىنىڭ مالىمەتىنشە, حالىققا ويىنعا تاۋەلدىلىكتىڭ قاۋپى جانە ونىڭ دامۋ بەلگىلەرى تۋرالى اقپارات بەرىلەدى, باعدارلامالىق جاساقتاما نەمەسە وتباسىلىق كەلىسىمدەر ارقىلى ويىندارعا جۇمسالاتىن ۋاقىتقا شەكتەۋلەر قويىلادى. ەلىمىزدىڭ ءار وڭىرىندە ويىنداردان تىس حوببي مەن بەلسەندىلىك ساقتالاتىن سالاۋاتتى الەۋمەتتىك ورتا قۇرىلعان. ودان بولەك, تاۋەلدىلىكپەن كۇرەسۋدىڭ ادىستەرى مەن ستراتەگيالارىن ۇسىنا الاتىن پسيحولوگتار مەن تاۋەلدىلىك ماماندارىنىڭ كەڭەستەرى ايتالادى. قازاقستاندىقتاردى سپورتتىق, شىعارماشىلىق جانە ءبىلىم بەرۋ ءىس-شارالارىنا قاتىسۋعا ىنتالاندىرادى. سونداي-اق دەنساۋلىققا بايلانىستى پروبلەمالار, الەۋمەتتىك وقشاۋلانۋ جانە قارجىلاي قيىندىقتار سياقتى تاۋەلدىلىكتىڭ جاعىمسىز سالدارى تالقىلانادى.

پسيحوتەراپەۆت مامان ازارتقا بەرىلگەن جانداردىڭ قاتارىندا ايەلدەر دە بارىن ايتادى. ولار ەشتەڭە جاساماي-اق كوپ اقشا تاۋىپ كەتەمىن دەگەنگە سەنەدى.

“لۋدومانداردىڭ اراسىندا قيال-عاجايىپقا سەنەتىن, شىنايى ءومىردى قابىلداي المايتىن ايەلدەر دە بار. ولار بولمايتىن دۇنيەلەرگە سەنىپ, الدانىپ قالادى. مىسالى, قارجىلىق پيراميدا حالىقتى 2 ميلليراد تەڭگەگە الداپ كەتىپتى دەپ جاتادى. سولاردىڭ ىشىندە جۇرگەندەردىڭ 80 پايىزى – ايەلدەر. 5-10 ميلليون تەڭگە سالىپ, 1 جىلدان كەيىن 50 ميلليون تەڭگە قىلىپ قايتارىپ الاسىڭ دەگەنگە سەنەتىن ايەلدەر دە بار. بۇل دا لۋدومانيانىڭ ءبىر سيپاتى. بىراق ايەل بولسىن, ەركەك بولسىن ولاردىڭ پسيحولوگيالىق جاراقاتتارى ءبىر. 100 لۋدوماننىڭ 3-4-ءى ايەل بولۋى مۇمكىن.

تاۋەلدىلىكتەن ارىلۋ ءۇشىن نە ىستەۋ كەرەك?

مامان لۋدومانيامەن اۋىراتىن ناۋقاستىڭ جاقىندارى جاۋاپكەرشىلىكتى تولىقتاي ونىڭ وزىنە بەرۋ كەرەگىن ايتادى. قۇمارويىنشىنىڭ تۋىستارىنىڭ باستى قاتەلىگى دە وسىندا.

“ولار لۋدوماننىڭ ماسەلەسىن شەشىپ, قارىزدارىن جاۋىپ بەرەدى, ايەلىمەن تاتۋلاستىرادى, بالا-شاعاسىن اسىرايدى. بىلايشا ايتقاندا, ازارتتان الىستاماۋعا جاعداي جاسايدى. بۇركىت بالاسىن ومىرگە بەيىمدەۋ ءۇشىن قۇزدان يتەرەتىنى سەكىلدى ادامداردا دا دۇرىس سەپاراتسيا بولۋى ءتيىس. ءومىر سۇرگىسى كەلەتىندەر اياققا تۇرىپ كەتەدى, السىزدەر سول كۇيى ىلەسە الماي كەتەدى. بىراق اتا-انا ولارعا بىردەي تاربيە بەردى, ءومىر ءسۇرۋدى ۇيرەتتى, ءبىلىم بەردى. ارى قاراي جاۋاپكەرشىلىكتى ەرەسەك ادام رەتىندە وزىنە بەرۋى ءتيىس. ودان جاۋاپكەرشىلىكتى تارتىپ الۋ, پروبلەماسىن شەشىپ بەرۋ – لۋدوماننىڭ جاقىندارىنىڭ جىبەرەتىن ەڭ ۇلكەن قاتەلىگى”, – دەيدى مامان.

پسيحوتەراپەۆتىڭ ايتۋىنشا, لۋدومانيانى ءدارى-دارمەكپەن ەمدەۋ ەشقانداي ناتيجە بەرمەيدى. ءدارى-دارمەك بەلگىلى ءبىر نەيرونداردى ۋاقىتشا ولتىرەدى دەيدى.

“بىزگە دەيىن 50-70 جىل بۇرىن امەريكالىق عالىمدار پسيحوتروپتىق زاتتاردى زەرتتەپ, ونىڭ تيىمدىلىگىنىڭ تومەن ەكەنىن دالەلدەگەن. ءدارى-دارمەك تەك ۋاقىتشا اسەر ەتەدى. ول جاعدايدى ودان سايىن ۋشىقتىرادى. سول سەبەپتى ناۋقاس ويىنعا دەگەن تاۋەلدىلىكتەن ارىلۋ ءۇشىن وعان بالاما نارسە تابۋ كەرەك. ول ادام وسى ۋاقىتقا دەيىن ءىشىپ, شەگىپ وسىلايشا باسىنداعى پروبلەمالارىن ۇمىتىپ جۇرسە, ەندى ونىڭ ورنىنا تاۋعا شىعىپ, اتقا ءمىنىپ, بالىققا بارىپ ەمدەلۋدىڭ باسقا جولدارىن قاراستىرۋ كەرەك. سوندىقتان تاۋەلدىلىكتەن ارىلۋدىڭ ەڭ ءتيىمدى جولى – پسيحوتەراپيا ارقىلى پسيحوەموتسيونالدىق كۇيدى رەتتەۋ, بالانسقا الىپ كەلۋ”, – دەپ سانايدى مامان.

نۇرداۋلەت سادىبەكتىڭ ايتۋىنشا, پسيحولوگيالىق جاراقاتتان بولەك ادامنىڭ مەنتالدىق ساۋلىعىنىڭ ءالسىز بولۋى تاۋەلدىلىككە الىپ كەلەدى. مەنتالدىق ساۋلىعى وسال ادامدار كەز كەلگەن تاۋەلدىلىككە بەيىم بولادى.

“مىسالى, ءبىلىم, عىلىم ادامنىڭ مەنتالدىق ساۋلىعىن, ساناسىن, رۋحىن كوتەرەدى. سونداي-اق ادامنىڭ ورتاسى دا وعان اسەر ەتەدى. سول سەبەپتى اكە-شەشە بالاسىنىڭ قانداي ورتادا جۇرەتىنىن, كىممەن ارالاساتىنىن ءبىلۋ قاجەت جانە ولارمەن دوستىق قارىم-قاتىناس قۇرا الۋى ءتيىس. 16, 17 جاستاعى جىگىتتەر مۇنداي جاعدايلار تۋرالى اتا-اناسىنا ايتقىسى كەلمەيدى, بارىنەن جاسىرادى. سول ساتتە اكە-شەشەسى ونىمەن دوس بولا السا جانە بالانى جازالاماي, كەرىسىنشە, اقىلىن ايتسا مۇمكىن ءبارى باسقاشا بولادى. اتا-انا بالاعا تىعىرىقتان شىعۋعا وزىنە تاڭداۋ بەرۋ ارقىلى كومەكتەسۋ كەرەك. “اقشانى وعان سالعانشا وتباسىمىزبەن تاۋعا شىعايىق, تابيعاتقا بارايىق, جاقىندارمەن ۋاقىت وتكىزەيىك. سەن قالاي ويلايسىڭ, قايسىسى دۇرىس” دەپ اكە نەمەسە انا فورماتىندا جەتەكشى بولۋ كەرەك”, – دەپ اتاپ ءوتتى ول.
تۇراقتى جانە قايتالاناتىن قۇمار ويىنعا قاتىستى پروبلەمالىق مىنەز-ق ۇلىق كلينيكالىق ماڭىزدى بۇزىلىستارعا جانە كۇيزەلىسكە اكەلىپ سوعادى. 12 اي ىشىندە مىنانداي بەلگىلەردى بايقاۋعا بولادى:

ادامدا قۇمار ويىنعا دەگەن قاجەتتىلىك پايدا بولادى, ىشتەي تولقۋ مەن ءلاززاتتى سەزىنۋ ءۇشىن ول ستاۆكانىڭ باعاسىن كوتەرەدى;
ول قۇمار ويىننان تىيىلۋ تۋرالى ويلاسا مازاسى قاشىپ, اشۋشاڭ بولىپ كەتەدى;
قۇمار ويىنعا تاۋەلدى ادام بىرنەشە رەت ويىننان باس تارتىپ, ءوزىن تىيىپ كورگەن. بىراق ونىڭ بۇل ارەكەتتەرى ءساتساز اياقتالادى;
ول قۇمار ويىنعا بەرىلىپ كەتكەن. ۇنەمى بۇرىنعى ويىندارى تۋرالى ويلايدى نەمەسە الداعى ويىندارىن جوسپارلاپ جۇرەدى. باسكە سالاتىن اقشانى تابۋدىڭ جولدارىن ىزدەيدى;
ادام ءوزىن قورعانسىز, مازاسىز, جابىرقاۋ سەزىنگەن كەزدە مىندەتتى تۇردە قۇمار ويىن وينايدى;
ويىنعا تىككە اقشاسىنان ايىرىلىپ قالسا ونى قايتارۋ ءۇشىن كەلەسى كۇنى مىندەتتى تۇردە قايتىپ كەلەدى.
ويىن قۇمار ادام ءوزىنىڭ قۇمار ويىنعا دەگەن تاۋەلدىلىگىن وزگەلەردەن جاسىرۋ ءۇشىن وتىرىك ايتادى;
ول قۇمار ويىنعا وزىنە قىمبات دانمەن قارىم-قاتىناسىن, جۇمىس, وقۋ مەن مانسابىن تىگەدى. ناتيجەسىندە وسىنىڭ بارىنەن ايىرىلادى;
تاۋەلدى ادام قۇمار ويىننىڭ كەسىرىنەن تاپ بولعان ماتەريالدىق قيىندىقتاردى شەشۋ ءۇشىن باسقا ادامعا ارقا سۇيەيدى.
كەيدە قۇمار ويىنعا تاۋەلدى بولۋعا ومىرلىك جاعدايلار دا سەبەپ بولىپ جاتادى. اتاپ ايتقاندا, قارجىلىق, وتباسىلىق ماسەلەلەر, جۇمىستاعى پروبلەمالار, دەنساۋلىقتىڭ ناشارلاۋى. الايدا مۇنداي ومىرلىك قينىندىقتاردان قۇمار ويىن قۇتقارادى دەپ ويلاۋ – قاتەلىك.