تاكسي جۇرگىزۋشىلەرىنە جاقسى حابار

فوتو: Tengrinews.kz

قازاقستاندىق تاكسي جۇرگىزۋشىلەرىنە جەكە كاسىپكەر رەتىندە تىركەلۋ مىندەتتەلمەيتىن بولدى, دەپ جازادى inbusiness.kz سايتى.

ەلەكتروندى ۇكىمەت پورتالىندا جاڭا سالىق كودەكسىنىڭ جوباسى جاريالاندى. وندا قولدانىستاعى زاڭعا بىرقاتار جاڭا رەجيمدەر قوسىلدى.

جاڭا رەجيم بويىنشا بۇدان بىلاي تاكسي جۇرگىزۋشىلەرىنە جەكە كاسىپكەر رەتىندە تىركەلۋدىڭ قاجەتى جوق. بۇل زاڭ الداعى جىلدىڭ 1 قاڭتارىنان باستاپ كۇشىنە ەنەدى.

وسى ۋاقىتقا دەيىن تاكسيستەرگە جەكە كاسىپكەر رەتىندە تىركەلىپ, بانكتەن ارنايى كاسىپكەرلىك شوت اشىپ, جۇمىس ىستەۋ مىندەتتەلگەن ەدى.

ۇلتتىق ەكونوميكا ۆيتسە-ءمينيسترى امرين ازامات تاكسي جۇرگىزۋشىلەرى ەڭ تومەنگى 4 پايىزدىق بىرىڭعاي تولەم جاساپ, ءوزىن-ءوزىن جۇمىسپەن قامتىعاندار ساناتىندا قىزمەتىن كورسەتە الاتىنىن حابارلادى.

«بىرىڭعاي تولەمگە مىندەتتى زەينەتاقى جارنالارى, الەۋمەتتىك اۋدارىمدار جانە مەديتسينالىق ساقتاندىرۋ جارنالارى كىرەدى. بۇل رەجيمدە تابىس ايىنا 1,25 ميلليون تەڭگەدەن اسپاۋعا ءتيىس», – دەدى ول.

دەگەنمەن بۇل وزگەرىس بارلىق تاكسي جۇرگىزۋشىلەرىنە ارنالماعان. اتالعان رەجيمدە جۇمىس ىستەۋ ءۇشىن ايلىق ەسەپتىك كورسەتكىشىڭىز 340-تان اسپاۋعا ءتيىس. بۇل ءبىر ميلليون ەكى ءجۇز ەلۋ مىڭ تەڭگەگە تەڭ.

تاكسي جۇرگىزۋشىلەرىنىڭ جولاۋشىلاردان قولما-قول اقشاسىز تولەمدى قابىلداۋدان باس تارتۋى زاڭسىز ەكەنىن ەسكە سالامىز. ويتكەنى بۇل تۇتىنۋشىلاردىڭ قۇقىقتارىن بۇزۋ بولىپ سانالادى.

ەگەر تاكسي جۇرگىزۋشىسى سالىق تولەگىسى كەلمەي, ونىڭ قىزمەتىنە قولما-قول اقشا تولەۋدى سۇراسا, وعان ءبىرىنشى رەت ەسكەرتۋ, ەكىنشى رەتتە 15-تەن 50 اەك-كە دەيىن (55 380 تەڭگە نەمەسە 184 600 تەڭگە) ايىپپۇل سالىنادى.

ءدال وسىنداي جازا باقىلاۋ كاسسالىق ماشينالاردى پايدالانبايتىن جانە ساتىپ الۋشىعا چەك بەرمەيتىن كاسىپكەرلەرگە دە قولدانىلادى.