«Taıaqqa ish kıimin orap tyqqan»: Eki áıel ne sebepti 16 jastaǵy qyzǵa qorlyq kórsetti?

Almaty oblysynda eki áıel 16 jastaǵy qyzdy urlap qorlyq kórsetti. Áıelderdiń bireýiniń ákimdikte isteıtini belgili boldy, dep jazdy qandastar.kz

Qyzdyń anasy Orda.kz tilshisine suhbat berip mán-jaıdy aıtyp berdi.

Anasynyń aıtýy boıynsha oqıǵa bir jigit úshin bastalǵan eken. Kúdiktiniń jigiti 16 jastaǵy qyzǵa jazǵany úshin qyzǵanyshtan qorlyq jasaǵan.

«Meniń eki balam bar biri 16-da, ekinshisi 13-te. 16 jastaǵy qorlyq kórgen qyzym meniń ata-anamnyń, ıaǵnı, naǵashy ata-ájesiniń qolynda. Shelek aýylynda. 15 tamyz kúni qyzyma bir jigit áleýmettik jeli arqyly hat jazyp tanysady. Arada ýaqyt ótken soń qyzymnyń WhatsApp jelisine bir áıel jazyp: «jigitimmen sóılespe» dep hat joldaıdy. Qyzym «jaraıdy» dep jazǵan jigitti bloktap tastaıdy. Ertesi 16 tamyz kúni qyzyma áıel qaıta jazyp kezdeseıik deıdi. Qyzym aram oısyz kezdesýge kelisedi», — dedi anasy.

Anasynyń aıtýynsha kúdiktiler Shelek aýylyna kelip qyzdy kólikke otyrǵyzyp, esikti qulyptap, balaǵattap ura bastaǵan. Eki kúdikti ár áreketin beınejazbaǵa túsirip otyrǵan.

«Ol az bolǵandaı qyzymdy ózderiniń Masaq degen aýylyna aparyp aǵyn sýǵa batyryp, aıaqtaryn súıgizip mazaq etken. Tergeý kezinde bul beınejazbalardyń barlyǵyn kórdim. Sýǵa bes-alty ret batyrǵan. Qyzymnyń qoryqqany sonshalyq aıaǵyn qushaqtap súıip tur. Eń soraqysy qyzymnyń jynys múshesine taıaq tyqqan. Taıaqtyń basyna qyzymnyń ish kıimin baılaǵan», — dedi anasy.

Qorlyq kórgen qyzdyń anasynyń aıtýynsha bir aýyldan ekinshi aýylǵa barar jolda kúdiktiler tis tazalaǵysh satyp alǵan. Onyń aıtýynsha olar tis tazalaǵyshpen zorlamaq bolǵan.

«Qyzyma osyndaı qorlyq kórsetkenderdiń bireýi odan 3 mln teńge talap etken. Bolǵan oqıǵany anasyna nemese dosyńa aıtsań, barlyǵyn beınejazbaǵa túsirip, ony áleýmettik jelige taratamyz dep qorqytqan. Qyzymdy kıindirip bolǵan oqıǵany eshkimge aıtpa dep mańdaıynan súıgen», — dedi anasy Indıra.

Kúdiktiler qyzdyń ish kıimin aǵyn sýǵa aǵyzyp jibergen.

«Qyzym maǵan beınejazbamen jylap habarlasty. О́z-ózine qol jumsaıtynyn, bulaı ómir súre almaıtynyn aıtty. Eki kúdikti qyzyma habarlasyp aqsha suraǵan. Keıin maǵan habarlasty ol kezde olardyń tek urǵanyn biletinmin. Men olarǵa aryz jazatynymdy aıttym. Qyzymmen sóılestim. Bolǵan jaǵdaıdy aıtyp berdi. Tań qalyp, abdyrap qaldym», dedi Indıra.

Anasy bolǵan oqıǵany estı sala aýdandyq ishki ister bólimine bet alady. Onyń aıtýynsha, jábirlenýshi bolsa da aryz jazý óte qıyn bolǵan.

«Tańǵy toǵyzda barǵannan túńgi úshte bir-aq shyqtyq. Aryz qaldyrý úshin aýrýhanaǵa keıin ekspertıza jasatý kerek dedi. Qyzymnyń qurbysynyń ákesi kómektesip aryz jazdyq. Ázirge ekspertızanyń qorytyndysy shyqqan joq. Eki kúdiktini tez arada ustap qamaýǵa aldy», — dedi Indıra.

Kúdiktilerdiń ata-anasy kelip keshirim suraǵan. Sonymen qatar eki kúdiktiniń biri — 29 jastaǵy áıeldiń eki kishkentaı balasy bar eken.

«Men bul oqıǵany jarııalamas edim. Bir kúni týystarymyz aǵylyp úıge kele bastady. Olar aýyl arasynda taraǵan áńgimeden estipti. Biri WhatsApp jelisinen bilgen. Bul oqıǵany anam, qyzym úsheýmiz ǵana biletin edik. Osydan keıin quzyrly mekemelerge senim qalmady. Osylaı BAQ aldyna shyǵýǵa bel býdyq», — dedi anasy.

Jábirlenýshi qyzdyń anasy aqparatty jarııalaǵan quzyrly mekemege is qozǵaýdy talap etip otyr.

Qyzdyń ata-anasy on úsh jyl otaý quryp ajyrasqan eken. Aýyldyq jerde jumys bolmaǵandyqtan anasy Almatyda jumys isteýge májbúr. Al anasy qyzdyń ákesiniń bul oqıǵaǵa aralaspaq túgili estigisi kelmegenin aıtty.

Qazirgi tańda qyzǵa psıhologııalyq kómek kórsetilip jatyr. 16 jastaǵy qyz bıyl ýnıversıtet qabyrǵasynda oqýy kerek bolǵan. Biraq alǵan psıhologııalyq jaraqatynan oqýyn bir jylǵa shegeripti. Jábirlenýshi tarap tek bir ǵana bappen is qozǵalǵandyǵyna narazy. Is «kámelet jasqa tolmaǵan balaǵa zorlyq kórsetti» dep qozǵalǵan. Al anasy aqsha talap etkenin, uryp soqqanyn da iske qosýdy talap etedi.

Eske salar bolsaq, Almaty oblysynda 16 tamyzda 16 jastaǵy qyzdy eki áıel urlap, azaptaǵan. Kúdiktilerdiń biri Masaq aýyldyq okrýgi ákimi apparatynda qyzmet istegeni anyqtaldy. Olar jasóspirimdi uryp-soǵyp, temekimen kúıdirip, ózenge batyryp, zorlyq-zombylyq kórsetken. Barlyq áreketterin beınejazbaǵa túsirip, artynsha beınejabany taratamyz dep qorqytyp, 3 mıllıon teńge talap etken.