الەم جاڭالىقتارى
تاياۋ شىعىستاعى قاقتىعىس: يراننان 109 وتانداسىمىز ەۆاكۋاتسيالاندى
فوتو: سىرتقى ىستەر مينيسترلىگى
سىرتقى ىستەر مينيسترلىگى يراننان 109 وتانداسىمىز ەۆاكۋاتسيالانعانىن مالىمدەدى, دەپ جازدى qandastarz.k
بۇل تۋرالى Stan.kz اقپارات اگەنتتىگى حابارلايدى.
«تاياۋ شىعىستاعى جاعداي قارقىندى شيەلەنىسكەندە قازاقستان وز ازاماتتارىن يران يسلام رەسپۋبليكاسىنىڭ اۋماعىنان ەۆاكۋاتسيالاۋدى جەدەل ۇيىمداستىردى. ۇيلەسىمدى جۇمىس پەن ۆەدومستۆوارالىق ءوزارا ءىس-قيمىلدىڭ جوعارى دەڭگەيىنىڭ ارقاسىندا قازاقستاننىڭ سىرتقى ىستەر مينيسترلىگى, قۇزىرەتتى مەملەكەتتىك ورگاندارى مەن شەتەلدەگى ديپلوماتيالىق وكىلدىكتەرى 109 وتانداسىمىزدى ەلگە قايتاردى», – دەلىنگەن مينيسترلىك حابارلاماسىندا.
ۆەدومستۆو مالىمەتىنشە, ەۆاكۋاتسيا دوستاس مەملەكەتتەر اۋماقتارى ارقىلى ترانزيتپەن ىسكە اسىرىلعان. اتاپ ايتقاندا, 89 ادام يراننان تۇرىكمەنستان ارقىلى جانە 20 ادام ءازىربايجان ارقىلى ءوتتى.
فوتو: سىرتقى ىستەر مينيسترلىگى
«بارلىق ازاماتقا كونسۋلدىق-قۇقىقتىق كومەك كورسەتىلدى جانە وتانعا ورالۋ ءۇشىن قاجەت جاعداي جاسالدى», – دەيدى سىرتقى ىستەر مينيسترلىگى وكىلدەرى.
سىرتقى ىستەر مينيسترلىگى يران, تۇرىكمەنستان جانە ءازىربايجان بيلىگىنە قازاقستاندىقتاردىڭ بۇكىل باعىتى بويىنشا قاۋىپسىز جانە ۋاقىتىلى ءوتۋىن قامتاماسىز ەتۋدە ماڭىزدى ءرول اتقارعان كومەك پەن ناتيجەلى ءوزارا ءىس-قيمىل كورسەتكەنى ءۇشىن ريزاشىلىعىن بىلدىرەدى.
«ەۆاكۋاتسيالىق ءىس-شارالاردى دايىنداۋ جانە وتكىزۋ بارىسىندا قازاقستاندىق ديپلوماتتار تاۋلىك بويى جەرگىلىكتى بيلىكپەن ءىس-قيمىلدى ۇيلەستىرىپ, مارشرۋتتاردىڭ لوگيستيكاسىن قامتاماسىز ەتتى. سونداي-اق قۇزىرەتتى ورگاندارمەن ءوزارا ءىس-قيمىل جاسادى جانە وتانداستارىمىزعا قاجەت قولداۋدى كورسەتتى. قىسقا مەرزىمدە 200-دەن استام ازاماتىمىز حابارلاسىپ, ولارعا كومەك كورسەتىلدى. يرانداعى بارلىق قازاقستاندىقپەن ۇزدىكسىز بايلانىس ورناتىلىپ, ولاردىڭ الدىن الا كەلىسىلگەن ترانزيتتىك باعىتتارى بويىنشا ءجۇرىپ-تۇرۋى ۇيىمداستىرىلدى», – دەلىنگەن حابارلامادا.
مينيسترلىك وكىلدەرى وتانداستارىمىزدى ەلگە قايتارۋ بويىنشا جۇمىس جالعاسىپ جاتقانىن جانە باسقا قۇزىرەتتى ۆەدومستۆولارمەن بىرلەسىپ قازاقستان ازاماتتارىن يزرايل مەملەكەتىنەن ەۆاكۋاتسيالاۋ ماسەلەسى پىسىقتالىپ جاتقانىن مالىمدەدى.
