«Taza Qazaqstan». Kimniń «Jasyl kóshede» turǵysy keledi?

Qyzylorda oblysy, Jalaǵash aýdanynda «Jasyl kóshe» baıqaýy bastaldy. «Taza Qazaqstan» akııasy aıasynda ótetin sharada turǵyndar ózara synǵa túsedi. Olar ózi turatyn kósheni kúl-qoqystan tazalap, abattandyrady.

Uıymdastyrýshylardyń aıtýynsha, ıgi is óskeleń urpaqqa úlgi bolady. Jalaǵash kentindegi Buqarbaı batyr atyndaǵy kósheniń turǵyndary kóktem shyǵa tal-terektiń kútimin jasaýdy ádetke aınaldyrǵan. Jazda saıa bolatyn aǵashtyń túbin qopsytyp, áktep, zııankesterden qorǵaıdy. Zúbaırash Kárimova, kent turǵyny: – Jemis bolsyn, basqa bolsyn kógerse boldy, egińder dep nemeremizge, ekkizdik.

Oqýshylar, kishkentaılarymyzǵa deıin qolyna birnárse berip, jatqan qaǵazdy alyp júrińder, jatqan birdeńelerdi jınap júrińder dep úıretemiz ǵoı endi. «Tazalyq – tabaldyryqtan bastalady». Bul kósheniń jastary úlkender aıtqan osy qaǵıdany berik ustanady. Rasynda úı mańynda qylaýdaı qoqys joq. Bul sońǵy 6-7 jyl kóleminde qalyptasqan úrdis,-deıdi úlgili kóshe turǵyndar. Batyrbek Shaımaǵanbetov, kent turǵyny: – Úlken kisilerimiz aqyldaryn aıtyp, osyndaı birnárse uıymdastyrmadyńdar ma, ne isteısińder dep bizge aıtady. Sosyn osy jerde aǵalarymyz bar, inilerimiz bar, oılasyp, bir mámilege kelip, bárimiz sol nárselerdi uıymdastyramyz.

«Taza Qazaqstan» respýblıkalyq ekologııalyq akııasy aıasynda bastalǵan «Jasyl kóshe» baıqaýy aýdan turǵyndaryn yntalandyrǵan. Arnur Nurmaǵanbetov, aýdan ákiminiń orynbasary: – Akııa bastalǵaly biz barlyq eldi mekendi qamtyp otyrmyz. Osy jergilikti jerge beıimdelgen 10 myńnan astam kóshet egildi. Barlyq eldi mekenderdi qosa alǵanda, sonymen qatar 5 myń tonnaǵa jýyq turmystyq qaldyq shyǵaryldy. «Jasyl kóshe» baıqaýynyń jeńimpazdary arnaıy atalym boıynsha qarjylaı marapatqa ıe bolady.

Tazalyq sharasyn erekshe mazmunda ótkizýdi kózdegen jalaǵashtyqtar jasyl jelek aýmaǵyn eselep arttyrýdy kózdep otyr.