جاڭالىقتار
«تازا قازاقستان»: سەمەي ورمانىنىڭ اۋماعىنا 28 560 كوشەت وتىرعىزىلدى
اباي وبلىسىندا رەسپۋبليكالىق «تازا قازاقستان» ەكولوگيالىق اكتسياسى اياسىندا سەنبىلىكتەر وتۋدە. ايماققا قاراستى قالالار مەن اۋدانداردا كوگالداندىرۋ جانە قوقىس جيناۋ, ايالدامالاردى جۋ, ەسكەرتكىشتەردى تازالاۋ, اعاشتاردى اكتەۋ, ولاردىڭ ءتۇبىن قوپسىتۋ جۇمىستارى جۇرگىزىلۋدە.
سونىمەن قاتار, سەمەي ورمانىنىڭ اۋماعىنا 6 گەكتار جەرگە 28 560 كوشەت وتىرعىزىلدى.
اكتسياعا مەملەكەتتىك جانە جەكە مەنشىك مەكەمەلەر قىزمەتكەرلەرى, قوعامدىق ۇيىمداردىڭ وكىلدەرى, ستۋدەنتتەر, وقۋشىلار قاتىستى. شاراعا قاتىسقان وبلىس اكىمى نۇرلان ۇرانحاەۆ ازاماتتاردى رەسپۋبليكا كولەمىندەگى اۋقىمدى اكتسياعا بەلسەنە اتسالىسىپ, ءوز ۇلەستەرىن قوسۋعا شاقىردى.
مەملەكەت باسشىسىنىڭ باستاماسىن بۇكىل سەمەي جۇرتشىلىعى, وبلىس تۇرعىندارى قولدايمىز. قازىر وبلىسىمىزدىڭ ءاربىر اۋدان, قالالارىندا سەنبىلىكتەر وتكىزىلۋدە. 2 ايلىق تازالىق جۇمىستارى شەڭبەرىندە كوشەلەردى, جول جيەكتەرىن, قوعامدىق ورىندارداعى قوقىستى جيناۋ, ولاردى شىعارۋ, اباتتاندىرۋ جانە تاعى باسقا وزگە دە سانيتارلىق شارالار قالامىزدىڭ ءار اۋدانى مەن شالعايداعى اۋىلدارىنا دەيىن قامتيتىن بولادى, — دەدى ايماق باسشىسى.
وبلىس اكىمى ودان ءارى «بەيبىتشىلىك» ارالىعىنداعى بۇرىڭعى قالقىمالى كوپىر اۋماعىنا بارىپ, جاعالاۋداعى بەكىتۋ جۇمىستارىمەن دە تانىستى. سوڭىنان قالا اكىمىنە جاعدايدى باقىلاۋدا ۇستاۋدى, سونىمەن قاتار ارالدى سۋ باسۋ قاۋپىنىڭ الدىن-الۋعا قاتىستى تاپسىرمالار بەردى.
جالپى, اعىمداعى جىلى وبلىسىمىزدا 65 000 ءتۇپ كوشەت وتىرعىزىلادى (اباي اۋدانى — 4 000 ءتۇپ, اياگوز اۋدانى — 8 000 ءتۇپ, بەسقاراعاي اۋدانى — 8 000 ءتۇپ, بورودۋليحا اۋدانى — 7 000 ءتۇپ, جارما اۋدانى — 5 000 ءتۇپ, كوكپەكتى اۋدانى — 6 000 ءتۇپ, اقسۋات اۋدانى — 6 000 ءتۇپ, كۋرچاتوۆ قالاسى — 3 000, سەمەي قالاسى — 9 100 ءتۇپ, جاڭاسەمەي اۋدانى — 900 ءتۇپ, ءۇرجار اۋدانى — 7 000 ءتۇپ, ماقانشى اۋدانى — 1 000 ءتۇپ).
سەمەيدە قوعامدىق ورىنداردىڭ اۋماقتارىندا جالپى اۋدانى 13 500 شارشى مەتر بولاتىن قوسىمشا گۇلزار وتىرعىزىلادى, ونىڭ ىشىندە: 4 500 شارشى مەتر اۋماعىندا كوپجىلدىق گۇلدەر, 9 000 شارشى مەتر جەرگە ماۋسىمدىق گۇلدەر.
«تازا قازاقستان» اكتسياسى ءار اپتا سايىن ءتۇرلى باعىتتاردا ەكولوگيالىق ءىس-شارالارمەن جالعاسا بەرمەك.
