جاڭالىقتار
تەگىن 10 سوتىق جەر: الماتى وبلىسىنداعى جەر تەلىمدەرى تاراتىلادى
الماتى وبلىسىندا بۇرىنعى ساياجاي القاپتارىنىڭ اۋماعىندا جەر تەلىمدەرى بەرىلە باستايدى. مەملەكەتتەن تەگىن 10 سوتىق جەر الۋعا كەزەكتە تۇرعاندار وسى ۋچاسكەلەرگە يە بولادى, دەپ حابارلايدى Qandastar.kz اقپارات پورتالى BAQ.KZ-كە سىلتەمە جاساپ.
ءاربىر قازاقستاندىق تۇرعىن ءۇي سالۋ ماقساتىندا مەملەكەتتەن تەگىن 10 سوتىق جەر الۋعا قۇقىلى. بۇل پروتسەستى ونلاين تۇردە, ەشقانداي قۇجات جيناۋسىز جۇرگىزۋگە بولادى.
جەر تەلىمدەرى تەك بارلىق ينفراقۇرىلىم – سۋ, ەلەكتر جەلىلەرى تارتىلعاننان كەيىن عانا بەرىلەدى. ينفراقۇرىلىمسىز جەر بەرىلمەيدى, بۇل كەزەكتىڭ جىلجۋ جىلدامدىعىنا ايتارلىقتاي اسەر ەتەدى.
الداعى ۋاقىتتا الماتى وبلىسىندا جەر تەلىمدەرىن بەرۋ ايتارلىقتاي جەدەلدەۋى مۇمكىن. «كرىشا» پورتالىنىڭ مالىمەتىنشە, كەزەكتەگىلەرگە جەر بۇرىنعى ساياجاي القاپتارىنىڭ ورنىنان بەرىلەدى, ولار ەلدى مەكەندەردىڭ قۇرامىنا ەنگىزىلمەك.
بيىل وبلىس بويىنشا 23 ساياجاي القابىن ەلدى مەكەندەر قۇرامىنا قوسۋ جوسپارلانىپ وتىر. ياعني ولار رەسمي تۇردە قالا, اۋىل جانە كەنتتەردىڭ اۋماعىنا ەنەدى. كەيىن بۇل جەرلەردىڭ ماقساتى وزگەرتىلىپ, باۋ-باقشا ۋچاسكەلەرى جەكە تۇرعىن ءۇي قۇرىلىسىنا (جتق) ارنالماق. وسىدان كەيىن جەر تەلىمدەرى كەزەكتەگىلەرگە بەرىلەدى, – دەلىنگەن حابارلامادا.
بەرىلەتىن ساياجايلاردىڭ جالپى اۋدانى – 123 گەكتار, ياعني بۇل 10 سوتىقتان اساتىن 1200-دەن استام جەر تەلىمى. ونىڭ ۇستىنە, بۇل ۋچاسكەلەر ينجەنەرلىك جەلىلەرى مەن جولدارى بار يگەرىلگەن القاپتاردان بەرىلمەك.
ايتا كەتەيىك, وتكەن جىلى الماتى وبلىسىندا جتق ءۇشىن بار بولعانى 294 جەر تەلىمى (شامامەن 29 گەكتار) عانا بەرىلگەن. ال قازىرگى ۋاقىتتا وبلىس بويىنشا 10 سوتىق تەگىن جەر الۋعا كەزەكتە 1 284 488 ادام تۇر. دەمەك, بۇل ساياجايلىق جەرلەردىڭ بارىنە بىردەي جەتپەيدى.
الايدا قازاقستاندىقتارعا ەسكەرەتىن جايت: جەر تەلىمىن مىندەتتى تۇردە ءوز تۇرعىلىقتى مەكەنجايى بويىنشا عانا الۋ مىندەتتى ەمەس. ازاماتتار ءارتۇرلى ايماقتار مەن وبلىستارعا – ءار ەلدى مەكەنگە ءبىر وتىنىشتەن – شەكتەۋسىز ءوتىنىش بەرە الادى. بىراق ءبىر جەر تەلىمى بەرىلگەن كەزدە قالعان بارلىق وتىنىشتەر اۆتوماتتى تۇردە جويىلادى.
