Tegin 10 sotyq jer: Almaty oblysyndaǵy jer telimderi taratylady

Almaty oblysynda burynǵy saıajaı alqaptarynyń aýmaǵynda jer telimderi berile bastaıdy. Memleketten tegin 10 sotyq jer alýǵa kezekte turǵandar osy ýchaskelerge ıe bolady, dep habarlaıdy Qandastar.kz aqparat portaly BAQ.KZ-ke silteme jasap.

Árbir qazaqstandyq turǵyn úı salý maqsatynda memleketten tegin 10 sotyq jer alýǵa quqyly. Bul proesti onlaın túrde, eshqandaı qujat jınaýsyz júrgizýge bolady.

Jer telimderi tek barlyq ınfraqurylym – sý, elektr jelileri tartylǵannan keıin ǵana beriledi. Infraqurylymsyz jer berilmeıdi, bul kezektiń jyljý jyldamdyǵyna aıtarlyqtaı áser etedi.

Aldaǵy ýaqytta Almaty oblysynda jer telimderin berý aıtarlyqtaı jedeldeýi múmkin. «Krysha» portalynyń málimetinshe, kezektegilerge jer burynǵy saıajaı alqaptarynyń ornynan beriledi, olar eldi mekenderdiń quramyna engizilmek.

Bıyl oblys boıynsha 23 saıajaı alqabyn eldi mekender quramyna qosý josparlanyp otyr. Iaǵnı olar resmı túrde qala, aýyl jáne kentterdiń aýmaǵyna enedi. Keıin bul jerlerdiń maqsaty ózgertilip, baý-baqsha ýchaskeleri jeke turǵyn úı qurylysyna (JTQ) arnalmaq. Osydan keıin jer telimderi kezektegilerge beriledi, – delingen habarlamada.

Beriletin saıajaılardyń jalpy aýdany – 123 gektar, ıaǵnı bul 10 sotyqtan asatyn 1200-den astam jer telimi. Onyń ústine, bul ýchaskeler ınjenerlik jelileri men joldary bar ıgerilgen alqaptardan berilmek.

Aıta keteıik, ótken jyly Almaty oblysynda JTQ úshin bar bolǵany 294 jer telimi (shamamen 29 gektar) ǵana berilgen. Al qazirgi ýaqytta oblys boıynsha 10 sotyq tegin jer alýǵa kezekte 1 284 488 adam tur. Demek, bul saıajaılyq jerlerdiń bárine birdeı jetpeıdi.

Alaıda qazaqstandyqtarǵa eskeretin jaıt: jer telimin mindetti túrde óz turǵylyqty mekenjaıy boıynsha ǵana alý mindetti emes. Azamattar ártúrli aımaqtar men oblystarǵa – ár eldi mekenge bir ótinishten – shekteýsiz ótinish bere alady. Biraq bir jer telimi berilgen kezde qalǵan barlyq ótinishter avtomatty túrde joıylady.