«تەگىن جۇمىس ىستەۋگە دايىنمىن»: قيلىبايدىڭ ەكس-توقالى توقاەۆقا كەڭەسشى بولعىسى كەلەتىنىن ايتتى

ماڭعىستاۋ وبلىستىق ءماسليحاتتىڭ بۇرىنعى دەپۋتاتى, وبلىس اكىمى نۇرداۋلەت قيلىبايدىڭ بۇرىنعى سەرىگى ىنتاش ناۋرىزوۆا مەملەكەت باسشىسىنا اشىق حات جازىپ, كەڭەسشى قىزمەتىن سۇرادى, دەپ جازدى qandastar.kz

ول ايلىقسىز, تەگىن جۇمىس ىستەۋگە دايىن ەكەنىن ايتىپ, باستى ماقساتى – ايەلدەر مەن بالالار قۇقىعىن قورعاۋ ەكەنىن جەتكىزدى, دەپ حابارلايدى Skifnews.kz اقپارات پورتالى.

«قۇرمەتتى پرەزيدەنت مىرزا, مەنى كەڭەسشى قىلىپ قىزمەتكە الىڭىزشى. ايلىق تولەۋدىڭ دە قاجەتى جوق. از دا بولسا ايەلدەر مەن بالالارعا كومەگىم تيسە بولدى. سىزگە شىنايى جاعدايدى بايانداپ وتىرايىن», – دەپ جازدى ناۋرىزوۆا.

ەكس-دەپۋتات بۇل ويىن TikTok-تا جاريالاپ, قوعامدى سابىرعا شاقىردى. ول پرەزيدەنتتىڭ سوڭعى جولداۋىندا ايتىلعان ايەلدەر تاقىرىبىنداعى پىكىرىن دۇرىس تۇسىنۋگە شاقىردى.

«اجىراسۋ مەن بوقتىق ءسوز ايتىپ, ايقاي شىعاراتىن ايەلدەرگە قاتىستى ايتقانى دۇرىس. بىراق بۇل بارلىق ايەلدەردى كەمسىتۋ ەمەس. پرەزيدەنتتىڭ كوتەرگەن ماسەلەسى – شىنايى پروبلەما. ءبىزدىڭ قوعامدا قۇجات جۇزىندە اجىراسىپ, شىن مانىندە بىرگە تۇراتىنداردىڭ بارى راس. بىراق بۇل ماسەلە جاردەماقىنى ازايتىپ تاستاۋ ارقىلى شەشىلمەيدى», – دەيدى ناۋرىزوۆا.

ول ايەلدەرگە قاتىستى زورلىق-زومبىلىق ماسەلەسىن ەرەكشە اتاپ ءوتىپ, بيلىككە بۇل باعىتتا ناقتى شەشىمدەر قابىلداۋدى ۇسىندى.

«قوعامنىڭ تىنىشتىعىن بۇزۋدى ادامنىڭ جىنىسىنا ءبولۋدىڭ قاجەتى جوق. ايتپەسە, ەر ادامدار اراسىندا «پرەزيدەنتتىڭ ءوزى قولدامايدى ەكەن» دەگەن قاۋىپتى وي قالىپتاسۋى مۇمكىن. ال بىزدە ايەلدەردى قورعاۋعا قاتىستى زاڭدار بار, تەك دۇرىس قولدانۋ قاجەت», – دەدى ول.

ناۋرىزوۆا سوڭعى ۋاقىتتا ايەلدەردىڭ نارازىلىعىن تۋدىرعان تاقىرىپتارعا بيلىك جاۋاپ بەرەدى دەپ سەنەتىنىن دە قوستى.