تەك ەسكە الۋ ەمەس, سونىمەن قاتار ۇلتتىق رۋحىمىزدىڭ سيمۆولى – پرەزيدەنت استاناداعى جەڭىس پارادى تۋرالى

فوتو:اقوردا

مەملەكەت باسشىسى قاسىم-جومارت توقاەۆ 2025 جىلعى 24 ساۋىردە قازاقستان حالقى اسسامبلەياسىنىڭ XXXIV سەسسياسىندا سويلەگەن سوزىندە استانادا وتەتىن جەڭىس شەرۋى تۋرالى ايتتى, دەپ حابارلايدى qandastar.kz Zakon.kz-كە سىلتەمە جاساپ.

پرەزيدەنت ەكى اپتادان كەيىن الەمدىك ماڭىزى بار تاريحي وقيعا – ۇلى جەڭىسكە 80 جىل تولادى. ءبىز بۇل مەرەيتويدى كەڭ كولەمدە اتاپ وتەمىز دەدى.

«قازاقستاننىڭ مايدانگەرلەرى مەن تىل ەڭبەككەرلەرى – بارشا حالقىمىز وتان ءۇشىن وتقا ءتۇستى. ۇلى جەڭىستىڭ تاعىلىمى بارشا حالىققا, اسىرەسە, ساياساتكەرلەرگە كسەنوفوبياعا, ناسىلدىك جانە ۇلتتىق ۇستەمدىككە, حالىقارالىق قۇقىق قاعيداتتارىن قۇرمەتتەمەۋگە قۇرىلعان جاۋاپكەرشىلىكتەن جۇرداي ساياسات جۇرگىزۋدىڭ سالدارى قانداي قاسىرەتكە اكەلەتىنىن ءالى كۇنگە دەيىن كورسەتىپ وتىر.» قاسىم-جومارت توقاەۆ

بىرەر كۇن بۇرىن مەنىڭ تاپسىرماممەن رەسپۋبليكالىق ونوماستيكالىق كوميسسيا ەلدى مەكەندەردەگى 500-دەن استام كوشەگە بۇعان دەيىن ەلەۋسىز قالعان جەرگىلىكتى قاھارمانداردىڭ ەسىمىن بەرۋ تۋرالى شەشىم قابىلدادى.

«ەڭ الدىمەن, جاڭا جانە اتاۋى قايتالاناتىن كوشەلەرگە باسىمدىق بەرىلەدى. بۇل شەشىم – ۇلى جەڭىستى, وعان قاتىسۋشىلاردى قانشالىقتى قادىر تۇتاتىنىمىزدى كورسەتەتىن ماڭىزدى قادام. ۇلى جەڭىس تۋرالى ۇمىتپاۋ دەگەنىمىز, بۇل – ەڭ الدىمەن, ەرجۇرەك باتىرلارىمىزدى جادىمىزدا ساقتاۋ, ولاردىڭ جانقيارلىق ەڭبەگى مەن ەرلىگىن, پارىزعا ادال جانە انتقا بەرىك بولعانىن ۇمىتپاۋ دەگەن ءسوز. ءبىز سول سۇراپىل سوعىس كەزىندە تەڭدەسسىز باتىرلىق پەن باتىلدىق كورسەتكەن وتانداستارىمىزدى ءاردايىم وراسان زور قۇرمەتپەن ەستە ساقتايمىز.» پرەزيدەنت

پرەزيدەنت جەڭىستىڭ 80 جىلدىعىنا دايىندىق تۋرالى وسىدان ءبىر جارىم جىل بۇرىن الدىن الا ايتقان.

«سوعان سايكەس ءبىز « ۇلى جەڭىس: ەرلىككە تاعزىم, ۇرپاققا ۇلگى» جوسپارىن ارنايى قابىلداپ, جۇزەگە اسىرا باستادىق. وسى اۋقىمدى جۇمىستىڭ اياسىندا ەكى مىڭنان استام مادەني, عىلىمي-زەرتتەۋ, اعارتۋ جانە باسقا دا ءىس-شارالار وتكىزىلەدى. ەڭ باستىسى, ارينە, مەملەكەت پەن قوعامنىڭ ەرەكشە قورعاۋىندا بولاتىن قۇرمەتتى ارداگەرلەرىمىزگە ايرىقشا كوڭىل بولەمىز. ۇلى جەڭىستىڭ مەرەيلى داتاسىن اتاپ وتۋگە ارنالعان ءىس-شارالار لەگى اۋقىمدى اسكەري شەرۋگە ۇلاسادى. تۇپتەپ كەلگەندە, بۇل اسكەري شەرۋدىڭ ءمان-ماڭىزى زور بولماق. سەبەبى مۇنى ءبىر جاعىنان مايدانگەرلەر مەن تىڭگەرلەرگە تاعزىم دەسەك, ەكىنشى جاعىنان قازىرگى كۇردەلى گەوساياسي احۋالدا ۇلتتىق رۋحىمىزدىڭ مىقتىلىعىن كورسەتەتىن سيمۆول دەۋگە بولادى». مەملەكەت باسشىسى