جاڭالىقتار
تەلەارنالارعا قازاق ءتىلدى كونتەنت از بولعانى ءۇشىن ايىپپۇل سالىنباق
فوتو: رexels.com
مادەنيەت مينيسترلىگى قازاق تىلىندە ءتيىستى كولەمدە حابار تاراتپاعان تەلەارنالار مەن راديوستانتسيالارعا اكىمشىلىك جاۋاپكەرشىلىك ەنگىزۋدى ۇسىندى, دەپ جازدى qandastar.kz
بۇل تۋرالى Stan.kz اقپارات اگەنتتىگى حابارلايدى.
2025 جىلدىڭ 1 قاڭتارىنان باستاپ كۇشىنە ەنگەن نورماعا سايكەس, اپتالىق ەفير ۋاقىتىنىڭ كەمىندە 55%-ى قازاق تىلىندەگى كونتەنتكە ارنالۋعا تيىس. بۇل تالاپ رەسمي تۇردە بولعانىمەن ونى بۇزعاندارعا ەشقانداي ايىپپۇل سالىنعان جوق.
قازىر اكىمشىلىك قۇقىقبۇزۋشىلىقتار كودەكسىنە وزگەرىستەر ەنگىزۋ تۋرالى جاڭا جوبانى قازاقستاندىقتار 10 شىلدەگە دەيىن تالقىلاپ جاتىر. بۇل قۇجاتتا تىلدىك كۆوتادان بولەك, جارناما ءليميتىن اسىرىپ جىبەرگەن تەلە-راديو حابار تاراتۋشىلارعا دا جازا قولدانۋ ۇسىنىلعان. قولدانىستاعى زاڭ بويىنشا, جارناما ەفير ۋاقىتىنىڭ تاۋلىگىنە 20%-ىنان اسپاۋى كەرەك.
سونىمەن قاتار مينيسترلىك الەۋمەتتىك جەلىلەر مەن ۆيدەوپلاتفورمالار سەكىلدى ونلاين الاڭداردا قۇقىققا قايشى كونتەنت تاراتقاندارعا ايىپپۇل سالۋ جۇيەسىن ەنگىزۋدى ۇسىندى. ۆەدومستۆو زاڭنامانى جاڭارتپاسا, تسيفرلىق كەڭىستىكتى باقىلاۋ بارعان سايىن قيىنداپ باراتىنىن اتاپ ءوتتى.
«2024 جىلى قازاقستاندىق ونلاين پلاتفورمالاردا 78,5 مىڭنان استام قۇقىققا قايشى كونتەنت انىقتالعان, ونىڭ 24,3%-ى عانا ءوشىرىلدى», — دەلىنگەن قۇجاتتا.
جوبا شەتەل تاجىريبەسىنە دە سۇيەنەدى. مىسالى, ەو ەلدەرىندە, ۇلىبريتانيا مەن وڭتۇستىك كورەيادا تىلدىك جانە جارنامالىق تالاپتاردى بۇزعانى ءۇشىن ميلليونداعان ەۋرو ايىپپۇل سالىنىپ, پلاتفورمالاردى بۇعاتتاۋعا دەيىنگى شارالار قاراستىرىلعان. قازاقستان بيلىگى وسىنداي تەتىك مەديا مەكەمەلەردىڭ جاۋاپكەرشىلىگىن ارتتىرىپ, مەملەكەتتىك ءتىلدى دامىتۋعا ىقپال ەتەدى دەپ سەنەدى.
بۇعان دەيىن قازاقستاندا 2030 جىلعا دەيىنگى ءتىل ساياساتى تۇجىرىمداماسى بەكىتىلگەن. وندا 2029 جىلعا قاراي مەملەكەتتىك تەلەارنالارداعى قازاقتىلدى باعدارلامالاردىڭ ۇلەسىن 85%-عا دەيىن جەتكىزۋ, ال حالىقتىڭ قازاق ءتىلىن مەڭگەرۋ دەڭگەيىن 84% ارتتىرۋ كوزدەلگەن.
