جاڭالىقتار
تەلەگرامداعى QirSabyn ادميندەرىنىڭ ۇستالۋى: تىڭ دەرەكتەر
20 جەلتوقساندا تەلەگرامداعى QirSabyn ارناسىنىڭ اكىمشىلەرى ۇستالدى. قۇزىرلى ورگاندار ولاردى 18 جەلتوقساندا ۇستاعان. ولار انونيم تۇردە تانىمال ادامداردىڭ ار-نامىسىنا تيەتىن جازبالار جاريالاپ, ولاردان اقشا تالاپ ەتىپ وتىرعان. تەلەگرام ارنانىڭ باسقارىپ وتىرعان ادامدارعا قاتىستى تىڭ دەرەكتەر پايدا بولدى, – دەپ حابارلايدى qandastar.kz
Dalanews.kz اقپاراتتى باس پروكۋراتۋرا رەسمي تۇردە راستادى. پروكۋراتۋرانىڭ ۇيلەستىرۋىمەن ۇقك جانە ءىىم ۆەدومستۆوارالىق جەدەل-تەرگەۋ توبىمەن جانە قما-ءنىڭ مامانداندىرىلعان بولىمشەسىمەن بىرلەسىپ, استانا جانە قاراعاندى قالالارىندا QirSabyn تەلەگرام-ارناسى ارقىلى شىندىققا جاناسپايتىن اقپاراتتى جاريالاۋ قاۋىپىمەن اقشالاي قاراجاتتى بوپسالاۋمەن اينالىسقان ادامدار توبى ۇستالعان.
«شۇعىل تەرگەۋ ارەكەتتەرى جۇرگىزىلىپ, تەحنيكالىق قۇرالدار, ءىرى كولەمدەگى اقشا سوماسى جانە وزگە دە زاتتاي دالەلدەمەلەر الىندى. تەلەگرام-ارناسىنىڭ اكىمشىلەرى سوتتىڭ سانكتسياسىمەن قاماۋعا الىندى», – دەپ حابارلايدى ۆەدومستۆو وكىلدەرى.
رپۋ «دانك» تەلەگرام ارناسىنداعى مالىمەت بويىنشا, ۇستالعانداردىڭ اراسىندا 19-20 جاستاعى جاستار بار. ولار 1,5 جىلدىڭ ىشىندە قوماقتى تابىس تاۋىپ, نەگىزىنەن قازاقستاننان تىس جەردە ءسان-سالتاناتتى ءومىر ءسۇرىپ, قىمبات كولىكتەر ساتىپ الىپ, ەڭ ەليتالىق قوناقۇيلەردە دەمالعان.
ءوز ارەكەتتەرىن جاسىرۋ ءۇشىن ارنانىڭ ادميندەرى جازبالاردى ءوشىرۋ ءۇشىن تولەمدى تەك كريپتوۆاليۋتا ارقىلى قابىلداپ, قارجىلىق وپەراتسيالاردى جاسىرىن جۇرگىزۋ ماقساتىندا كوپتەگەن شەتەلدىك بانكتىك كارتانى قولدانعان. بۇل كارتالار «دروپتاردىڭ» اتىنا راسىمدەلگەن. ايتا كەتەيىك, دروپتار دەگەن – وزدەرىنىڭ دەرەكتەرى قارجىلىق وپەراتسيالاردا قولدانىلاتىنىن بىلمەيتىن ادامدار.
ارنانىڭ بارلىق ادميندەرى ءبىر-بىرىمەن بايلانىستى, ال كەيبىرەۋلەرى ءتىپتى تۋىس ەكەن. ولار تەلەگرامداعى جازبالارىن ءوشىرۋ 1000 – 15 مىڭ اقش دوللارىنا دەيىن اقشا الىپ وتىرعان. تەك ءبىر عانا كريپتواميان ارقىلى 70 مىڭ اقش دوللارىنان اساتىن ترانزاكتسيا جاسالعانى انىقتالدى.
سونىمەن قاتار, ادميندەر بوپسالاۋ ارقىلى العان اقشالارىنا ءجيى ساياحاتتايتىن. ونىڭ ىشىندە, تۇركيا مەن بىرىككەن اراب امىرلىكتەرىندە كوپ جۇرگەن.
رپۋ دانك مالىمەتىنشە, قۇزىرلى ورگاندار تەلەگرام ارنانىڭ ادميندەرى كىم ەكەنىن باياعىدان بىلەتىن, الايدا ولاردىڭ ىشىندەگى ەڭ باستى ادام ۇزاق ۋاقىت بويى تۇركيادا جۇرگەن. ول استاناعا كەلگەن كەزىندە باسقا ادميندەرمەن بىرگە ۇستالعان.
