تەلەجۇرگىزۋشى تولەنبەگەن سالىققا قاتىستى پىكىر ءبىلدىردى

فوتو: اشىق دەرەككوز

الەۋمەتتىك جەلىدە سالىق مىندەتتەمەسىن ورىنداۋعا قاتىستى «بلوگەرلەردىڭ ءتىزىمى» جاريالاندى. تانىمال تۇلعالار قاتارىندا بلوگەرلەردەن بولەك انشىلەر, تەلەجۇرگىزۋشىلەر, پروديۋسەرلەر دە بار. ءوزىن بۇل تىزىمنەن كورگەن تەلەجۇرگىزۋشى ءلايلا سۇلتانقىزى بۇعان قاتىستى پىكىر ءبىلدىردى, دەپ جازدى qandastar.kz

«ماعان وسىنداي قاعاز كەلدى – بۇل تىزىمدەگىلەر وڭ جاق باعاندا كورسەتىلگەن سومانى بيۋدجەتكە تولەيدى-ءمىس نەمەسە وسى سومادان جەكە تابىس سالىعى ۇستالاتىنداردىڭ ءتىزىمى بولۋى مۇمكىن, ءوزىم دە تولىق تۇسىنبەدىم.

ءتىزىم راس پا, جالعان با, بىلمەيمىن», – دەپ جازادى جۋرناليست.

بۇل تىزىمنەن ءوزىنىڭ اتى-ءجونىن كورگەن تەلەجۇرگىزۋشى ءلايلا سۇلتانقىزى جەلىدە تاراعان جازباعا قاتىستى پىكىر ءبىلدىردى.

«وزگەلەر ءۇشىن جاۋاپ بەرە المايمىن. مەن سوڭعى 5-6 جىلدا دارا كاسىپكەر رەتىندە تىركەلىپ, زاڭدى تۇردە سالىعىمدى تولەپ وتىرمىن. بىراق بىردەن ايتايىن, مەنىڭ اينالىمىم مىنا جەردە كورسەتىلگەن سوماعا ساي كەلمەيدى. ءارى 2023 جىلى 10 شىلدەدە كۇشىنە ەنگەن ونلاين-پلاتفورمالار جانە ونلاين-جارناما تۋرالى قازاقستان رەسپۋبليكاسىنىڭ زاڭىنا ساي تولىعىمەن جۇمىس ىستەپ جاتىرمىن دەپ سەنىمدى تۇردە ايتا الامىن.

مەن ءوزىم سالىق, قۇجات دەگەندەرگە بەي-جاي قاراي المايتىن اداممىن. ونى كومەكشىلەرىم دە, زاڭگەرىم دە, ەسەپشىم دە راستاي الادى. سوندىقتان دا الداعى ۋاقىتتا سالىق ورگاندارىنا جۇگىنىپ, مىندەتتى تۇردە قايتا تەكسەرىستى تالاپ ەتەمىن. سالىقتان ەشكىم جالتارمايدى, جالتارماۋعا دا ءتيىس. ول الەۋمەتتىك سالانىڭ بىردەن-ءبىر قاينار كوزى. جاناشىرلىق تانىتىپ جاتقان جاندارعا دا العىس. الداعى ۋاقىتتا سالىق ەسەپتەلىگىنىڭ ناتيجەسىمەن مىندەتتى تۇردە بولىسەمىن», – دەپ جازدى تەلەجۇرگىزۋشى.

ايتا كەتەيىك, 18 اقپاندا مەملەكەتتىك كىرىستەر كوميتەتى وكىلدەرى بلوگەرلەرگە كىرىسىن تومەندەتۋ بۇزۋشىلىقتارى بويىنشا كامەرالدىق باقىلاۋ حابارلامالارى جىبەرىلگەنىن حابارلاعان ەدى.

قۇزىرلى ورگانداعىلار 594 تۇلعاعا قاتىستى 53,3 ملرد تەڭگەگە سايكەسسىزدىك انىقتالعانىن مالىمدەگەن.