Telejúrgizýshi tólenbegen salyqqa qatysty pikir bildirdi

Foto: ashyq derekkóz

Áleýmettik jelide salyq mindettemesin oryndaýǵa qatysty «blogerlerdiń tizimi» jarııalandy. Tanymal tulǵalar qatarynda blogerlerden bólek ánshiler, telejúrgizýshiler, prodıýserler de bar. О́zin bul tizimnen kórgen telejúrgizýshi Láılá Sultanqyzy buǵan qatysty pikir bildirdi, dep jazdy qandastar.kz

«Maǵan osyndaı qaǵaz keldi – bul tizimdegiler oń jaq baǵanda kórsetilgen somany bıýdjetke tóleıdi-mis nemese osy somadan jeke tabys salyǵy ustalatyndardyń tizimi bolýy múmkin, ózim de tolyq túsinbedim.

Tizim ras pa, jalǵan ba, bilmeımin», – dep jazady jýrnalıst.

Bul tizimnen óziniń aty-jónin kórgen telejúrgizýshi Láılá Sultanqyzy jelide taraǵan jazbaǵa qatysty pikir bildirdi.

«О́zgeler úshin jaýap bere almaımyn. Men sońǵy 5-6 jylda dara kásipker retinde tirkelip, zańdy túrde salyǵymdy tólep otyrmyn. Biraq birden aıtaıyn, meniń aınalymym myna jerde kórsetilgen somaǵa saı kelmeıdi. Ári 2023 jyly 10 shildede kúshine engen Onlaın-platformalar jáne onlaın-jarnama týraly Qazaqstan Respýblıkasynyń Zańyna saı tolyǵymen jumys istep jatyrmyn dep senimdi túrde aıta alamyn.

Men ózim salyq, qujat degenderge beı-jaı qaraı almaıtyn adammyn. Ony kómekshilerim de, zańgerim de, esepshim de rastaı alady. Sondyqtan da aldaǵy ýaqytta salyq organdaryna júginip, mindetti túrde qaıta tekseristi talap etemin. Salyqtan eshkim jaltarmaıdy, jaltarmaýǵa da tıis. Ol áleýmettik salanyń birden-bir qaınar kózi. Janashyrlyq tanytyp jatqan jandarǵa da alǵys. Aldaǵy ýaqytta salyq esepteliginiń nátıjesimen mindetti túrde bólisemin», – dep jazdy telejúrgizýshi.

Aıta keteıik, 18 aqpanda Memlekettik kirister komıteti ókilderi blogerlerge kirisin tómendetý buzýshylyqtary boıynsha kameraldyq baqylaý habarlamalary jiberilgenin habarlaǵan edi.

Quzyrly organdaǵylar 594 tulǵaǵa qatysty 53,3 mlrd teńgege sáıkessizdik anyqtalǵanyn málimdegen.