جاڭالىقتار
تەمىرتاۋدا قاريانى اياۋسىز سوققىعا جىققاندارعا قانداي شارا كورىلمەك?
فوتو:ۆيدەودان سكرين
تەمىرتاۋدا قاريانى اياۋسىز سوققىعا جىعىپ, ونى ۆيدەوعا تۇسىرگەن كامەلەتكە تولماعان بالالارعا قاتىستى ماسەلە قاراعاندى وبلىسى اكىمدىگىندە قارالىپ, ءتيىستى شارالار قابىلداندى. بۇل تۋرالى وبلىس اكىمى ەرماعانبەت بولەكباەۆ ءوزىنىڭ الەۋمەتتىك جەلىدە پاراقشاسىندا جازدى, دەپ حابارلايدى qandastar.kz
“بۇگىن مەنىڭ ورىنباسارىم الىبەك الدەنەي قاراعاندى وبلىسى بويىنشا كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيانىڭ وتىرىسىن وتكىزدى.
تەمىرتاۋ قالاسى اكىمىنىڭ الەۋمەتتىك ماسەلەلەر جونىندەگى ورىنباسارىنا كامەلەتكە تولماعاندارعا تيىسىنشە باقىلاۋ جاساماعانى ءۇشىن قاتاڭ سوگىس جاريالاۋدى تاپسىردىم.
سونداي-اق, جاسوسپىرىمدەر وقىعان ءبىلىم بەرۋ مەكەمەلەرى ديرەكتورلارىنىڭ ورىنباسارلارى تارتىپتىك جاۋاپكەرشىلىككە تارتىلدى.
ءبىز جاسوسپىرىمدەر اگرەسسياسىنا ءسوزسىز الاڭدايمىز جانە بولاشاقتا وسىنداي وقىس وقيعالاردى ازايتۋ بويىنشا قوسىمشا شارالار ازىرلەۋگە كىرىسەمىز. بارلىق كىنالىلەر قولدانىستاعى زاڭناما شەڭبەرىندە جاۋاپكەرشىلىككە تارتىلادى. بۇل وقيعا بويىنشا پوليتسيا تەرگەۋ جۇرگىزۋدە.
سونداي-اق اتا-انالاردان, پەداگوگتاردان بالالاردى تاربيەلەۋگە جانە ولاردىڭ باسقا ادامدارعا قۇرمەتپەن قاراۋىن, دۇرىس قۇندىلىقتاردى قالىپتاستىرۋعا كوبىرەك كوڭىل ءبولۋدى سۇرايمىن. ءبىز ءوز تاراپىمىزدان جاسوسپىرىمدەردى الەۋمەتتىك قولداۋ مەن الدىن الۋ شارالارىن كۇشەيتۋ جۇمىستارىن جالعاستىرامىز”,- دەپ جازدى ءوڭىر باسشىسى.
ەستەرىڭىزگە سالا كەتەيىك, بۇعان دەيىن تەمىرتاۋدا كامەلەتكە تولماعاندار توبى قارت ەر ادامنىڭ ۇيىنە باسا-كوكتەپ كىرىپ, ونى اياۋسىز سوققىعا جىعىپ, بولعان جايتتى ۆيدەوعا تۇسىرگەنى تۋرالى جازعان بولاتىنبىز.
