تەمىرتاۋدا تاربيەشى بالاباقشاعا ماس كۇيدە كەلىپ, بالالارعا كۇش كورسەتكەن

فوتو: ۆيدەودان سكرين

تەمىرتاۋدا تاربيەشى ماس كۇيدە بالاباقشاعا كەلىپ, بالالارعا اگرەسسيۆتى قارىم-قاتىناس جاساعان. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

«ايگولەك» مەملەكەتتىك بالاباقشاسىندا ورىن العان وقيعاعا بايلانىستى قىزمەتتىك تەكسەرۋ جۇرگىزىلۋدە. تاربيەشى جۇمىستان ۋاقىتشا شەتتەتىلدى. قىزمەتتىك تەكسەرۋ ناتيجەلەرى بويىنشا جاۋاپتى تۇلعالارعا, جۇمىستان شىعارۋ شارالارىنا دەيىن, وبەكتيۆتى شەشىمدەر قابىلدانادى», – دەپ حابارلادى تەمىرتاۋ قالاسىنىڭ ءبىلىم ءبولىمى.

30 قىركۇيەك كۇنى پوليتسياعا ءانونيمدى قوڭىراۋ ءتۇسىپ, تاربيەشىنىڭ بالاباقشادا بالالارعا دورەكى ارەكەت ەتىپ, ماس كۇيدە جۇرگەنى تۋرالى حابارلانعان. پوليتسەيلەر شاقىرتۋ بويىنشا كەلىپ, تاربيەشىنى مەديتسينالىق ساراپتاماعا الىپ كەتكەن.

«ول بالالاردىڭ قولدارىنان تارتىپ, پيجامالارىن لاقتىرىپ جىبەرگەن. ۆيدەودا پوليتسيا قىزمەتكەرلەرىنىڭ عيماراتقا كىرىپ, ونى الىپ شىققانى تۇسىرىلگەن. الايدا اتا-انالارعا بۇل ۆيدەوجازبانىڭ ءدال وسى بولىگىن كوشىرۋگە رۇقسات بەرمەدى», – دەپ حابارلادى جەرگىلىكتى باسىلىم.