جاڭالىقتار
تەمىرتاۋدا جاسوسپىرىمدەر ءجۇرىپ بارا جاتقان كولىككە جارماسقان
تەمىرتاۋدا جاسوسپىرىمدەر قوزعالىستاعى كولىك ارتىنا جابىسىپ, جولدا ومىرلەرىن قاتەرگە تىكتى, – دەپ حابارلايدى Qandastar.kz اقپارات پورتالى.
قاراعاندى وبلىسىندا كامەلەتكە تولماعان ءۇش بالانىڭ جولدا كەتىپ بارا جاتقان گازەل اۆتوكولىگىنە جارماسىپ, جول بويىمەن قوزعالعان ءساتى تۇسىرىلگەن بەينەجازبا الەۋمەتتىك جەلىلەردە تارادى.
وقيعا جول قوزعالىسى ەرەجەلەرىن ورەسكەل بۇزۋمەن قاتار بالالاردىڭ ومىرىنە ەلەۋلى قاۋىپ توندىرگەن.
جەدەل تۇردە جۇرگىزىلگەن تەكسەرۋ ناتيجەسىندە وقۋشىلاردىڭ جەكە تۇلعالارى انىقتالدى. ولار 10-11 جاس ارالىعىنداعى مەكتەپ وقۋشىلارى بولىپ شىقتى. بارلىق بالا زاڭدى وكىلدەرىمەن بىرگە پوليتسيا بولىمىنە جەتكىزىلدى.
بالالاردىڭ اتا-انالارىنا قاتىستى بالا تاربيەسىنە نەمقۇرايلى قاراعانى ءۇشىن اكىمشىلىك جاۋاپكەرشىلىككە تارتىلدى.
اتالعان ءىس بويىنشا ماتەريالدار كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسياعا جولداندى.
سونىمەن قاتار جاسوسپىرىمدەر مەكتەپىشىلىك ەسەپكە الىناتىن بولادى.
