جاڭالىقتار
تەڭگە 5,5 پايىزعا السىرەدى
ماۋسىم ايىنىڭ قورىتىندىسى بويىنشا تەڭگە باعامى 1 اقش دوللارى ءۇشىن 471,84 تەڭگەگە دەيىن, ياعني 5,5 پايىزعا السىرەدى, دەپ حابارلايدى qandastar.kz.
رەسمي مالىمەت بويىنشا, قازاقستان قور بيرجاسىنداعى ساۋدا-ساتتىقتىڭ ورتاشا كۇندىك كولەمى ءبىر ايدا 251 ملن اقش دوللارىنان 183 ملن اقش دوللارىنا دەيىن تومەندەگەن. ساۋدا-ساتتىقتىڭ جالپى كولەمى 3,7 ملرد اقش دوللارىن قۇرادى.
«ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن ماۋسىم ايىندا 420 ملن اقش دوللارىنا ۆاليۋتا ساتىلدى. ۇلتتىق قوردان ساتۋ ۇلەسى جالپى ساۋدا-ساتتىق كولەمىنىڭ 11%-ىن جانە كۇنىنە 21 ملن اقش دوللارىنان اسپايتىن مولشەردى قۇرادى. ۇلتتىق بانك ۇلتتىق قوردىڭ قاراجاتىمەن وپەراتسيالار جۇرگىزۋ كەزىندە نارىقتىڭ بەيتاراپ قاعيداتىن ساقتايدى. بۇل – شەتەل ۆاليۋتاسىن ۇدايى جانە بىركەلكى ساتۋدى بىلدىرەدى. بۇل تاجىريبە ۇلتتىق قور وپەراتسيالارىنىڭ ۆاليۋتا نارىعىنا اسەرىن بارىنشا ازايتۋعا مۇمكىندىك بەرەدى», – دەلىنگەن حابارلامادا.
ماماندار بيىلعى شىلدە ايىنان باستاپ بجزق زەينەتاقى اكتيۆتەرىنىڭ ۆاليۋتالىق ۇلەسىن ۇستاپ تۇرۋ ءۇشىن ۆاليۋتا ساتىپ الۋ كۇتىلەتىنىن ايتۋدا. ونىڭ كولەمى 250 ملن اقش دوللارىنان 350 ملن اقش دوللارىنا دەيىنگى مولشەردى قۇراماق.
