جاڭالىقتار
تەڭگەنىڭ ورنىنا رۋبل جازعان: قازاقستاندىق اتا-انا 4-سىنىپتا وقيتىن بالاسىنىڭ وقۋلىعىنداعى ماتىنگە شاعىمداندى
فوتو: Stan.kz
استانالىق پروكۋرور ساياحات نۇربەك جەلىدەگى پاراقشاسىندا قازاق تىلىندە وقىتاتىن مەكتەپتەردىڭ 4-سىنىپ «ماتەماتيكا» وقۋلىعىندا قاتە كەتكەنىن جاريالادى. وقۋلىقتا تەڭگەنىڭ ورنىنا «رۋبل» جانە «دوللار» دەپ جازىلعان. Stan.kz ءتىلشىسى ءمان-جايدى تولىعىراق ءبىلۋ ءۇشىن وقۋ-اعارتۋ مينيسترلىگىنە قاراستى رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعىنا حابارلاستى.
ساياحات نۇربەك وقۋلىقتاعى «8 ءا», «9» جانە «10» جاتتىعۋلارىندا 2$, 100 رۋبل, 140 رۋبل, 16 رۋبل 80 كوپەيكا دەپ كورسەتىلگەنىن جاريا ەتتى.
ال رەداكتسيا رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعىنا حابارلاسىپ, قولدانۋشىنىڭ جاريالانىمىنا قاتىستى پىكىر سۇرادى.
«4-سىنىپقا ارنالعان الماتىكىتاپ باسپاسىنىڭ ماتەماتيكا وقۋلىعى «باستاۋىش, نەگىزگى ورتا جانە جالپى ورتا ءبىلىم دەڭگەيلەرىنىڭ جالپى ءبىلىم بەرەتىن پاندەرى مەن تاڭداۋ كۋرستارى بويىنشا ۇلگىلىك وقۋ باعدارلاماسىنا» (قر ءبىلىم جانە عىلىم ءمينيسترىنىڭ 2013 ج. 03.04.2013. №115 بۇيرىعى) ساي ازىرلەنىپ, 2019 جىلى وقۋ پروتسەسىنە ەنگىزىلگەن», – دەدى ورتالىق.
ورتالىقتىڭ مالىمەتىنشە, 4-سىنىپقا ارنالعان «ماتەماتيكا» پانىنىڭ ۇلگىلىك وقۋ باعدارلاماسىنىڭ بازالىق مازمۇنىندا شەتەلدىك جانە ۇلتتىق ۆاليۋتالارمەن تانىسۋ, ءتۇرلى مەملەكەتتەردىڭ ۆاليۋتالارىن (رۋبل, ەۆرو, دوللار) اجىراتۋ جانە ءتۇرلى تولەمدەر جاساۋ وقۋ ماقساتتارى رەتىندە قاراستىرىلعان.
«وسى وقۋ ماقساتتارىن جۇزەگە اسىرۋ ءۇشىن وقۋلىقتىڭ 56-بەتىندەگى «ەۆرو, دوللار. ۆاليۋتامەن ورىندالاتىن وپەراتسيالار» تاقىرىبىنداعى 14-ساباقتا, 60-بەتتەگى «رۋبل. ۆاليۋتالارمەن ورىندالاتىن وپەراتسيالار» تاقىرىبىنداعى 15-ساباقتا وقۋشىلار باسقا مەملەكەتتەردىڭ ۆاليۋتاسىمەن تانىسادى جانە ۇساقتاۋدى ۇيرەنەدى. بۇل رەتتە ءۇي تاپسىرماسى رەتىندە وقۋلىقتا رەسەي ۆاليۋتاسىمەن قاتار, ەۆرو, تسەنت, دوللار سياقتى باسقا مەملەكەتتەردىڭ اقشا اتاۋىمەن تانىستىرۋ ماتەريالدارى بەرىلگەن», – دەپ جاۋاپ بەردى ساراپتاۋ ورتالىعى.
ەسكە سالايىق, بۇعان دەيىن قازاقستاندىق sai_abu ەسىمدى ايەل 3-سىنىپ وقيتىن بالاسىنىڭ «قازاق ءتىلى» وقۋلىعىندا «قىرگۇيەك» جانە «وزگوروت» ءسوزى قاتە جازىلعانىن ايتىپ شاعىمدانعان ەدى. ول وقۋ باعدارلاماسىنىڭ اۆتورلارىنا «نەلىكتەن مۇنداي قاتە جىبەرەدى?» دەپ اشۋلاندى. بۇعان ساراپتاۋ ورتالىعى رەسپۋبليكالىق تەرمينولوگيا كوميسسياسى ماقۇلداعان ورفوگرافيالىق سوزدىككە سايكەس بەرىلگەنىن ايتتى.
