ءبىلىم
«تەرپيلاسىڭدار»: مەكتەپ ديرەكتورى مۇعالىمدەرىن ۇزاق جىلدار بويى قارا جۇمىسقا جەككەن
فوتو:سكرين
ۇستازدار ءبىلىم بەرۋ ىسىمەن اينالىسۋدىڭ ورنىنا, ۇزاق جىلدار بويى قارا جۇمىسقا جەگىلگەندەرىن ايتىپ, جانايقايىن جەتكىزدى. مەكتەپ ديرەكتورىنىڭ پارمەنىمەن ولار مەكتەپ اۋلاسىن تازالاپ, سپورتزال مەن كابينەتتەردى جوندەۋدەن باستاپ, باسشىنىڭ جەكە شارۋاشىلىعىنا كومەكتەسۋگە دەيىن ءماجبۇر بولعان, دەپ حابارلايدى Qandastar.kz Ulysmedia.kz-كە سىلتەمە جاساپ.
“31 ارنا” اقپاراتىنشا قولدارىنا تىرما ۇستاعان ۇستازدار ۇزاق جىلدار بويى قارا جۇمىسقا جەگىلدەرىن جەتكىزگەن. مەكتەپ ديرەكتورنىىڭ پارمەنىمەن اۋلاداعى ءشوپتى جيناپ سپورتزال مەن كابينەتتەرگە جوندەۋ جۇرگىزگەن. ەڭ سوراقىسى باسشىلارىنڭ قىستاعىنا بارىپ قۇدىق قازىپ ساراي مەن مونشا سالعان.
“مەن ەندى مەكتەپتىڭ سپورتزالىن ىستەدىم, پلاستيك تەرەزەلەرىن ىستەدىم, اكت زالعا رەمونت جاسادىق. جالعىز مەن ەمەس ۇلداردىڭ ءبارى ىستەدى. ءۇيىنىڭ, قىستاعىنىڭ جۇمىسىن ىستەدىك” – دەيدى ەرنار نۇرعازين ەسىمدى مەكتەپ مۇعالىمى.
ول ازداي قيت ەتسە اقشا جيناپ مۇعالىمدەردى مەزى قىلعان. بۇعان شىداماعان جالپى سانى 19 مۇعالىم ديرەكتوردىڭ اتىنا ارىز تۇسىرگەن. ناتيجەسىندە اباي اتىنداعى مەكتەپتىڭ ديرەكتورى قىزمەتىنەن بوساتىلىپ ينفورماتيكا ءپانىنىڭ مۇعالىمى عانا بولىپ قالعان. قازىر ول ۇستىنەن شاعىمدانعان مۇعالىمدەرگە قىسىم جاساپ قوقاڭ-لوققى كورسەتىپ ءجۇر دەيدى مۇعالىمدەر.
“بىزگە قىسىم كورسەتىپ جاتىر. قاعىپ-سوعىپ, قوقاڭ-لوققى جاساپ. “جازعىشبەكتەر” دەپ” – دەيدى نۇرجان ساعاديەۆ ەسىمدى مۇعالىم.
ال ءبىلىم وشاعىنىڭ بۇرىنعى باسشىسى بۇنىڭ ءبارىن جوققا شىعارىپ وزىنە شاڭ جۋىتپايدى.
“كەزىندە كومەك رەتىندە كۇيەۋ بالام, ىنىلەرىم بارعانىم راس. ماعان ارىز جازعانداردىڭ ىشىندە كۇيەۋ بالام دا ءجۇر. تەرپيلا دەپ ايتقانىم راس بولۋى مۇمكىن. ويتكەنى مەنى جازعاننان كەيىن ولار تەرپيلا. بىراق بوقتاعان جوقپىن” – دەيدى مەكتەپتىڭ بۇرىنعى ديرەكتورى روللان تىلەۋحانوۆ.
ال مۇعالىمدەر ار-نامىسىمىزدى تاپتاعان ادام ءتيىستى جازاسىن السىن دەپ وتىر.
