Terrorızmdi nasıhattaǵan tórt qazaqstandyq ustaldy

Foto: QR UQK

UQK prokýratýra organdarynyń úılestirýimen Astana qalasy, Abaı, Aqtóbe jáne Túrkistan oblystaryndaǵy dinı radıkaldardyń áreketiniń jolyn kesti, dep habarlaıdy qandastar.kz saıty QR UQK-ǵa silteme jasap.

Komıtet málimetinshe, terrorızmdi nasıhattap, dinı alaýyzdyqty qozdyrdy, onyń ishinde áleýmettik jeliler arqyly degen kúdikpen 4 qazaqstandyq ustaldy, olardyń bireýi buryn sottyly bolǵan.

 Turǵyn úılerin tintý barysynda zattaı dáleldemeler alyndy. Qylmystyq kodekstiń 174 jáne 256-baptary boıynsha sotqa deıingi tergep-tekserýler júrgizilýde, — delingen málimette.

Budan bólek, UQK buryn tergegen qylmystyq ister boıynsha sot Aqtóbe, Qaraǵandy jáne Túrkistan oblystarynyń 3 turǵynyna qatysty aıyptaý úkimderin shyǵardy. Sottalǵandar áleýmettik jelide jáne aınalasynda terrorızm men dinı ekstremızm ıdeologııasyn taratqan.