تەزگە سالاتىن تەست: قازاقستاندىق پوليتسەيلەردىڭ ادالدىعى تەكسەرىلمەك

فوتو: اشىق دەرەككوز

قازاقستاندا ءتارتىپ ساقشىلارىنىڭ ادالدىعى جاسىرىن تۇردە تەكسەرىلمەك, – دەپ حابارلايدى qandastar.kz.

ەگەر پوليتسەيلەر سىناقتان وتپەسە, تارتىپتىك جازاعا تارتىلۋى مۇمكىن ەكەنىن Stan.kz اقپارات اگەنتتىگى دە جازدى.

ءتيىستى جوبانى سىبايلاس جەمقورلىققا قارسى ءىس-قيمىل اگەنتتىگى ازىرلەگەن. قۇجات «اشىق ۇكىمەت» پورتالىندا جاريالاندى. قوعامدىق تالقىلاۋ 14 تامىزعا دەيىن جالعاسادى. تەستىلەۋ كەزىندە پوليتسيا قىزمەتكەرى جاسىرىن تۇردە اۋديو-ۆيدەوعا تۇسىرىلەدى.

زاڭ جوباسىندا تەستىلەۋدىڭ ءۇش ساناتى بەلگىلەنگەن:

• «ا» ساناتى: حالىقپەن ءوزارا ارەكەتتەسۋ كەزىندە قىزمەت كورسەتۋ ساپاسىن باعالاۋ;
• «ۆ» ساناتى: رەسمي راسىمدەر مەن جاۋاپكەرشىلىكتەردىڭ ساقتالۋىن باعالاۋ;
• «س» ساناتى: كاسىبي ەتيكا نورمالارىنىڭ ساقتالۋىن باعالاۋ.

تەستىلەۋ كەزىندە قىزمەتكەردىڭ رەاكتسياسى مەن مىنەز-قۇلقىن باعالاۋ ءۇشىن يميتاتسيالانعان جاعدايلار جاسايدى.

الايدا بارلىق پوليتسيا قىزمەتكەرلەرى سىناقتان وتپەيدى. تەستىلەۋشىلەر سىبايلاس جەمقورلىققا قارسى مونيتورينگ ناتيجەلەرىن, ازاماتتاردىڭ ارىز-شاعىمدارىن, باق جاريالانىمدارىن, ءتىپتى سوتسيولوگيالىق ساۋالناما دەرەكتەرىن تالداۋ نەگىزىندە تاڭدالادى. ەگەر قىزمەتكەر ادالدىق سىناعىنان وتپەسە, بىرقاتار شارالار قولدانىلاتىن بولادى.

«ا» ساناتىنداعى ستسەناري ورىندالماعان جاعدايدا ۋاكىلەتتى باسشىعا قىزمەت كورسەتۋ ساپاسىن جاقسارتۋ بويىنشا شارالار قابىلداۋ تۋرالى ۇسىنىس بەرىلەدى. «ۆ» جانە «س» ساناتتارى بويىنشا سىناقتان وتسپەسە جازباشا تۇردە تۇسىنىكتەمە جازىلادى.

ەگەر قىزمەتكەر جازباشا تۇسىنىكتەمەدە تارتىپتىك تەرىس قىلىق جاساعانىن مويىنداسا, كوميسسيا قىزمەتتىك تەكسەرۋ جۇرگىزبەي-اق تارتىپتىك جازا قولدانۋدى ۇسىنا الادى. ولاي بولماعان جاعدايدا, تەرگەۋ بەلگىلەنگەن تارتىپپەن جۇرگىزىلەدى.

بۇل جاعدايدا قىزمەتكەر تەستىلەۋدىڭ زاڭدىلىعىنا جانە تارتىپتىك جاۋاپكەرشىلىككە سوتقا شاعىمدانۋعا قۇقىلى.