الەم جاڭالىقتارى
TikTok اقش اۋماعىندا قايتا جۇمىس ىستەي باستادى
فوتو:kz.kursiv.media
TikTok الەۋمەتتىك جەلىسى اقش-تا 170 ميلليون پايدالانۋشىسىنا قىزمەت كورسەتۋدى قايتا جانداندىردى. بۇل شەشىم سايلانعان پرەزيدەنت دونالد ترامپتىڭ قوسىمشانى بۇعاتتاۋ مەرزىمىن كەيىنگە قالدىراتىنىن مالىمدەگەننەن كەيىن قابىلداندى, دەپ جازدى qandastar.kz
پرەزيدەنت ترامپ ءوزىنىڭ قىزمەتىنە كىرىسكەننەن كەيىن 90 كۇندىك ۋاقىتشا مەرزىم بەرەتىنىن جانە بۇل تۋرالى ارنايى مالىمدەمە جاسايتىنىن ايتتى.
2024 جىلدىڭ ساۋىرىندە اقش كونگرەسى قىتايلىق ByteDance كومپانياسىن پلاتفورمانى امەريكالىق كومپانياعا ساتۋعا مىندەتتەيتىن زاڭ قابىلدادى. بۇل تالاپ ورىندالماي, 2025 جىلدىڭ 19 قاڭتارىنان باستاپ الەۋمەتتىك جەلىگە تىيىم سالىنعان ەدى.
ByteDance پلاتفورمانى ساتۋدان باس تارتىپ, جەلىنى جابۋدىڭ الدىندا تۇردى. 19 قاڭتار جەكسەنبى كۇنى قوسىمشا امەريكالىق پايدالانۋشىلار ءۇشىن جۇمىسىن توقتاتتى.
kz.kursiv.media حابارلاعانداي, قوسىمشانى اشۋعا تىرىسقان پايدالانۋشىلارعا TikTok-تىڭ قولجەتىمسىزدىگى تۋرالى حابارلامالار كەلدى. الايدا كەيىن TikTوk ءوز مالىمدەمەسىندە سەرۆيستى قايتا قالپىنا كەلتىرۋ پروتسەسىنىڭ ءجۇرىپ جاتقانىن حابارلادى. كومپانيا سايلانعان پرەزيدەنت ترامپقا «قاجەتتى ايقىندىق پەن سەنىم ءۇشىن» العىسىن ءبىلدىرىپ, TikTok-تىڭ اقش-تا ۇزاق مەرزىمدى جۇمىس ىستەۋىن قامتاماسىز ەتۋ ءۇشىن ونىمەن بىرلەسىپ جۇمىس جاسايتىنىن ايتتى.
بۇل مالىمدەمەدەن كەيىن TikTok قوسىمشاسى ءارتۇرلى پلاتفورمالاردا قايتادان قولجەتىمدى بولدى.
