TikTok arqyly qumar oıyn uıymdastyrǵandar 10 mln teńge tapqan

Qarjylyq monıtorıng agenttigi Almatyda TikTok áleýmettik jelisi arqyly onlaın-qumar oıyndardy uıymdastyrǵan eki turǵynǵa qatysty sotqa deıingi tergep-tekserý isin aıaqtady, dep habarlaıdy Qandastar.kz aqparat portaly.

Tergeý barysynda kúdiktilerdiń turaqty túrde tikeleı efır ótkizip, qumar oıyn uıymdastyrǵany anyqtaldy.

Azamattar oıynǵa qatysý úshin aqsha qarajatyn banktik qosymshalar arqyly uıymdastyrýshylardyń shottaryna aýdaryp otyrǵan. Jınalǵan zańsyz tabys kólemi 10,5 mıllıon teńgeni qurady.

Sot úkimimen ekeýi de zańsyz oıyn bıznesin uıymdastyrǵany úshin kináli dep tanyldy.

Birine 1 jyl 6 aı merzimge bas bostandyǵynan aıyrý jazasy taǵaıyndalsa, ekinshisi 2 jyl 6 aıǵa bostandyǵyn shekteý túrindegi jazaǵa tartyldy.

Aıta ketý kerek, TikTok-taǵy oıyndardyń negizgi aýdıtorııasyn jastar quraǵan.