جاڭالىقتار
TikTok جاسوسپىرىمدەردىڭ قاۋىپسىزدىگى ءۇشىن جاڭا فۋنكتسيالاردى ىسكە قوسادى
اتاپ ايتقاندا, TikTok «وتباسىلىق باپتاۋلار» بولىمىندە اتا-انالارعا جاسوسپىرىمدەردىڭ قوسىمشاعا قولجەتىمدىلىگىن بەلگىلى ءبىر ۋاقىت ارالىعىندا شەكتەۋگە مۇمكىندىك بەرەتىن جاڭا فۋنكتسيانى ىسكە قوسۋدى جوسپارلاپ وتىر. سونداي-اق, پلاتفورما ساعات 22.00-دەن كەيىن TikTok-تى پايدالاناتىن جاسوسپىرىمدەردىڭ نازارىن اۋدارىپ, تىنىعۋىنا كومەكتەسەتىن جاڭا مۇمكىندىكتى ىسكە قوسپاق.
«وتباسىلىق باپتاۋلاردىڭ» قوسىمشا فۋنكتسيالارىTikTok-تاعى اتا-انالاردىڭ باقىلاۋ جۇيەسىنىڭ ءبىر بولىگى بولىپ تابىلاتىن «وتباسىلىق باپتاۋلاردىڭ» ىسكە قوسىلعانىنا بەس جىل بولدى. وسى جىلدار ىشىندە اتا-انالاردىڭ كەرى بايلانىسى مەن ساراپشىلاردىڭ ۇسىنىستارىن ەسكەرە وتىرىپ, TikTok جاڭا فۋنكتسيالاردى بىرنەشە رەت ەڭگىزىپ وتىردى. بۇل جولى TikTok قولدانباسىنىڭ ازىرلەۋشىلەرى «دەمالىس» دەگەن جاڭا فۋنكتسيانى قوستى. ول قوسىمشانى بەلگىلى ءبىر ۋاقىتقا بۇعاتتاۋعا مۇمكىندىك بەرەدى», — دەدى مادەنيەت جانە اقپارات ءمينيسترى ايدا بالاەۆا.
ەندى اتا-انالار بالالارىنا TikTok-قا قول جەتكىزۋدى شەكتەۋ ۋاقىتىن بەلگىلەي الادى, مىسالى, وقۋ ۋاقىتىندا نەمەسە تۇنگى ۋاقىتتا تسيفرلى دەتوكستقا قول جەتكىزۋ ءۇشىن قايتالاناتىن كەستەنى ورناتا الادى. شەكتەۋ قويىلعان ۋاقىت ارالىعىندا ءجاسوسپىرىمنىڭ TikTok-تى قولدانۋ سۇرانىسىن قابىلداي الادى. وعان قوسا «وتباسىلىق باپتاۋلاردىڭ» جاڭا فۋنكتسياسى اتا-انالارعا بالالارىنىڭ اككاۋنتتارى تۋرالى تولىق اقپارات الۋعا مۇمكىندىك بەرەدى.
Zakon.kz جازعانداي, ەندى اتا-انالار بالالارىنىڭ TikTok-تا كىمدەردى باقىلاپ وتىراتىنىن جانە ولاردىڭ اككاۋنتىنا كىمدەر جازىلعانىن كورە الادى. قانداي قولدانۋشىلاردىڭ اككاۋنتتارىن بۇعاتتاعانىن بىلە الادى.
ءتىپتى اتا-انالاردىڭ باقىلاۋى قوسىلماعان كەزدە دە, الداعى ايلاردا TikTok جاسوسپىرىمدەرگە قاۋىمداستىق ەرەجەلەرىنە سايكەس كەلمەيتىن كونتەنت تۋرالى اتا-انالارىنا حابارلاۋ مۇمكىندىگىن قوسۋدى جوسپارلاپ وتىر.
