جاڭالىقتار
تىكۇشاق اپاتى: سوربۇلاقتىڭ تۇبىنەن ءۇشىنشى ادامنىڭ دەنەسى تابىلدى
فوتو: قورعانىس مينيسترلىگى
12 تامىز كۇنى ەكيپاج كومانديرىنىڭ كومەكشىسى كاپيتان امان نۇرلان ۇلى امانگەلدىنىڭ دەنەسى تابىلدى. تاجىريبەلى ۇشقىش, كۇردەلى مەتەورولوگيالىق جاعدايلاردا بىرنەشە مارتە ۇشىپ جاتتىققان, دەپ حابارلايدى Qandastar.kz Skifnews.kz اقپارات پورتالىنا سىلتەمە جاساپ.
ءتۇرلى اۋقىمداعى جاتتىعۋلار مەن وپەراتسيالارعا قاتىسقان. جوعارى ورىنداۋشىلىق تارتىبىمەن جانە ءمىنسىز قىزمەتتىك بەدەلىمەن ەرەكشەلەنگەن. EC-145 تىكۇشاعىنداعى ۇشۋ ۋاقىتى – 295 ساعات.
قازا تاپقان ۇشقىشتاردىڭ ۇشەۋى دە اۋە قورعانىسى كۇشتەرى اسكەري ينستيتۋتىنىڭ تۇلەگى. ارىپتەستەرى مارقۇمداردى ءاردايىم كومەككە دايىن, قايىرىمدى, ءارى جاناشىر ازامات رەتىندە ەسكە الادى.
اكۆاتوريانى جانە وعان ىرگەلەس اۋماقتى زەرتتەۋ بويىنشا ىزدەستىرۋ شارالارى جالعاسا بەرمەك. وسىعان سايكەس تىكۇشاق بولىكتەرىن انىقتاۋ جانە جاعاعا شىعارۋ جۇمىستارى جۇرگىزىلىپ جاتىر.
اپاتتىڭ سەبەپتەرىن انىقتاۋ ءۇشىن تەرگەۋ امالدارى جۇرگىزىلۋدە.
قازاقستان رەسپۋبليكاسىنىڭ قورعانىس مينيسترلىگى مەن قارۋلى كۇشتەرىنىڭ باسشىلىعى قازا تاپقانداردىڭ تۋىستارى مەن جاقىندارىنا قايعىرىپ كوڭىل ايتادى, ولارعا بارلىق قاجەتتى كومەك كورسەتىلەتىن بولادى.
