Tikushaq apaty: Sorbulaqtyń túbinen úshinshi adamnyń denesi tabyldy

Foto: Qorǵanys mınıstrligi

12 tamyz kúni ekıpaj komandıriniń kómekshisi kapıtan Aman Nurlanuly Amangeldiniń denesi tabyldy. Tájirıbeli ushqysh, kúrdeli meteorologııalyq jaǵdaılarda birneshe márte ushyp jattyqqan, dep habarlaıdy Qandastar.kz Skifnews.kz aqparat portalyna silteme jasap. 

Túrli aýqymdaǵy jattyǵýlar men operaııalarǵa qatysqan. Joǵary oryndaýshylyq tártibimen jáne minsiz qyzmettik bedelimen erekshelengen. EC-145 tikushaǵyndaǵy ushý ýaqyty – 295 saǵat.

Qaza tapqan ushqyshtardyń úsheýi de Áýe qorǵanysy kúshteri áskerı ınstıtýtynyń túlegi. Áriptesteri marqumdardy árdaıym kómekke daıyn, qaıyrymdy, ári janashyr azamat retinde eske alady.

Akvatorııany jáne oǵan irgeles aýmaqty zertteý boıynsha izdestirý sharalary jalǵasa bermek. Osyǵan sáıkes tikushaq bólikterin anyqtaý jáne jaǵaǵa shyǵarý jumystary júrgizilip jatyr.

Apattyń sebepterin anyqtaý úshin tergeý amaldary júrgizilýde.

Qazaqstan Respýblıkasynyń Qorǵanys mınıstrligi men Qarýly kúshteriniń basshylyǵy qaza tapqandardyń týystary men jaqyndaryna qaıǵyryp kóńil aıtady, olarǵa barlyq qajetti kómek kórsetiletin bolady.