«ءتىل-قازىنا» شەتەلدەگى قانداستار ءۇشىن ءتىل مەڭگەرۋدىڭ جاڭا جولىن ۇسىندى

فوتو: اشىق دەرەككوز

عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ تاپسىرىسىمەن «ءتىل-قازىنا» ۇعپو-عى Abai.institute جوباسى اياسىندا قازاق ءتىلىن مەڭگەرۋدىڭ جاڭا جولدارىن ۇسىنادى. شەتەلدەگى قانداستار مەن قازاق تىلىنە قىزىعۋشىلىق تانىتقان ازاماتتارعا ارنالعان بۇل بەينەساباقتار كەز كەلگەن جاستاعى ءتىل ۇيرەنۋشىلەر ءۇشىن ىڭعايلى ءارى قولجەتىمدى, دەپ جازدى qandastar.kz

بەينەساباقتاردىڭ باستى ەرەكشەلىگى – كەز كەلگەن ۋاقىتتا وقۋعا بولادى. ءتىل ۇيرەنۋشى دارىستەردى ونلاين فورماتتا, ىڭعايلى ۋاقىتتا وقي الادى. ءار تاقىرىپ 10 مينۋتتا قىسقا ءارى ناقتى تۇسىندىرىلەدى. قازىرگى كەزدە ا1, ا2 (باستاپقى دەڭگەيلەر) بويىنشا 40 ساباق قولجەتىمدى. ازىرلەنگەن بەينەدارىستەر امبەباپ ادىستەمە نەگىزىندە جاسالعان. ياعني قازاق ءتىلىن وزگە ءتىلدىڭ كومەگىنسىز ۇيرەتۋگە ارنالعان بۇل ءتاسىل الەمنىڭ تۇكپىر-تۇكپىرىندەگى ءتىل ۇيرەنۋشىلەرگە ءتيىمدى. تىلدىك ورتاعا بويلاۋ ءادىسى الەمدە مويىندالعان ەڭ ءتيىمدى ءتىل ۇيرەتۋ ءتاسىلى سانالادى.

بەينەساباقتار ءتىلدى كەشەندى تۇردە ۇيرەتۋگە باعىتتالعان:

• تىڭدالىم, ايتىلىم, جازىلىم, وقىلىم داعدىلارىن دامىتۋ;
• كۇندەلىكتى ومىرگە قاجەتتى سوزدىك قور مەن گرامماتيكالىق قۇرىلىمداردى مەڭگەرۋ;
• قازاق مادەنيەتى مەن سالت-ءداستۇرى تۋرالى تانىمدىق اقپارات ۇسىنۋعا نەگىزدەلىپ جاسالعان.

ءار ساباق دەڭگەيلىك تاقىرىپقا ساي ەكى بولىمنەن تۇرادى. ءبىرىنشى بولىمدە تەوريا تۇسىندىرىلسە, ەكىنشى بولىمدە ماتەريال ەپيزودتىق كورىنىستەر ارقىلى بەرىلەدى.

قازىرگى تاڭدا قازاق ءتىلىن مەڭگەرۋگە سۇرانىس ارتۋدا. شەتەلدەگى قانداستار ءۇشىن انا ءتىلىن مەڭگەرۋ ۇلتتىق بىرەگەيلىكتى ساقتاۋدىڭ جولى بولسا, شەتەل ازاماتتارى ءۇشىن قازاق ءتىلى مادەنيەتارالىق بايلانىس ورناتۋعا مۇمكىندىك بەرەدى. Abai.institute پلاتفورماسى ارقىلى ۇسىنىلعان بەينەساباقتار بۇل سۇرانىسقا جاۋاپ بەرەدى جانە ءتىل ۇيرەنۋ پروتسەسىن جەڭىلدەتەدى.

بەينەساباقتار Abai.institute پورتالىندا جانە TilQazyna YouTube ارناسىنا جۇكتەلگەن.