ءتىل جاناشىرى ۆلاديسلاۆ تەننىڭ «فورمۋلا كازاحسكوگو يازىكا» اتتى كىتابى جارىق كوردى

بۇگىن قازاقستان حالقى اسسامبلەياسىنىڭ ارنايى جوباسى – «مەملەكەتتىك ءتىل – ەتنوسارالىق قاتىناس ءتىلى» اياسىندا «مەملەكەتتىك ءتىل – ەتنوسارالىق قاتىناس ءتىلى: ناتيجەلەر مەن جاڭا مىندەتتەر» اتتى دوڭگەلەك ۇستەل وتىرىسى ءوتتى.

سەنات دەپۋتاتى گەننادي شيپوۆسكيحتىڭ مالىمدەۋىنشە, بىلتىر تۇساۋى كەسىلگەن جوبا بيىل ءوز جۇمىسىن باستاعانىنا ءبىر جىل تولۋىن اتاپ ءوتتى. وسى ارالىقتا ءتۇرلى ەتنوس وكىلدەرى مەملەكەتتىك ءتىلدى ۇيرەنۋگە قىزىعۋشىلىق تانىتىپ, جوبا ەل ىشىندە ءتىلدى دامىتۋداعى ءتيىمدى الاڭعا اينالدى.

ءىس-شارا بارىسىندا جوبانىڭ ءبىر جىلداعى ناتيجەلەرى سارالانىپ, الداعى كەزەڭدەرگە ارنالعان جاڭا مىندەتتەر بەلگىلەندى. قاتىسۋشىلار مەملەكەتتىك ءتىلدىڭ ەتنوسارالىق قاتىناستاعى ورنى مەن ماڭىزىن تەرەڭ تالقىلادى.

سونىمەن قاتار, دوڭگەلەك ۇستەل اياسىندا ۆلاديسلاۆ تەن مىرزانىڭ «فورمۋلا كازاحسكوگو يازىكا» اتتى كىتابىنىڭ تانىستىرىلىمى ءوتتى. بۇل ەڭبەك — قازاق ءتىلىن ۇيرەنۋگە ۇمتىلعان كوپەتنوستى قوعام مۇشەلەرى ءۇشىن تاپتىرماس قۇرال. اۆتور قازاق ءتىلىن جۇيەلى, وڭاي ءارى ءتيىمدى مەڭگەرۋدىڭ وزىندىك فورمۋلاسىن ۇسىنعان.

مەملەكەتتىك ءتىل — ورتاق تۇسىنىكتىڭ, تاتۋلىقتىڭ, ۇلتتىق بىرەگەيلىكتىڭ باستى دىڭگەگى. ال مۇنداي جوبالار مەن ەڭبەكتەر وسى باعىتتاعى قادامىمىزدى نىقتاي تۇسەدى.