«ءتىپتى كۇلكىلى»: دەپۋتات «التىن القا» ءۇشىن بەرىلەتىن جاردەماقى مولشەرىن قاتاڭ سىنادى

فوتو: parlam.kz

ءماجىلىس دەپۋتاتى گاۋھار تاناشەۆا پرەمەر-مينيستر ولجاس بەكتەنوۆتەن «التىن القا», «كۇمىس القا», «قولا القا» وردەندەرىمەن ماراپاتتالعان انالارعا جاردەماقى مولشەرىن كوتەرۋ جايلى دەپۋتاتتىق ساۋالعا تولىققاندى جاۋاپ بەرۋدى سۇرادى دەپ حابارلايدى Qaz365.kz.

بۇگىندە ەلىمىزدە 583 مىڭنان استام كوپبالالى وتباسى تىركەلىپتى. ونىڭ ىشىندە 90 پايىزى 4 جانە 5 بالا تاربيەلەپ وتىرعان وتباسىلار سانى – 525 مىڭ.

دەپۋتات تاناشەۆا وسى وتباسىلاردى مازالايتىن ەڭ باستى پروبلەمانى اتاپ ءوتتى.

ەگەر ۇلكەن بالالارى 18 جاسقا تولعاننان كەيىن وقۋ ورىندارىنا تۇسە الماسا, ونداي جاعدايدا كوپبالالى وتباسىلار جاردەماقىدان دا, باسقا مەملەكەت تاراپىنان بەرىلەتىن كومەكتەن دە ايىرىلاتىنىن ايتادى.

«كوپبالالى انالارعا ارنالعان مەملەكەتتىك ناگرادالار مەن جەڭىلدىكتەردى قازىرگى ۋاقىتتا ءبىز قايتادان قاراستىرۋىمىز كەرەك. بۇل باستامانىڭ نەگىزگى ماقساتى – كوپبالالى انالارعا ارنالعان ماراپاتتاردى جاڭارتۋ جانە ولاردىڭ زاماناۋي قوعامدا لايىقتى قۇرمەت پەن قولداۋعا يە بولۋىن قامتاماسىز ەتۋ» – دەيدى دەپۋتات.

گاۋھار تاناشەۆا اتالمىش ماسەلەگە بايلانىستى ءۇش ۇسىنىس جاسالعانىن ءمالىم ەتتى.

«ۇكىمەت تاراپىنان جوعارىدا اتالعان پروبلەمالىق سۇراقتار بويىنشا جانە بىلتىرعى جاريالانعان دەپۋتاتتىق ساۋالعا تولىققاندى, بارلىق تالاپ بويىنشا جاۋاپ بەرۋدى سۇرايمىز», – دەيدى گاۋحار تاناشەۆا.

دەپۋتاتتىڭ سوزىنشە قازىرگى «التىن القا» جانە «كۇمىس القا» وردەندەرى ءۇشىن جاردەماقى مولشەرى ءتىپتى كۇلكىلى: جەتى بالا ءۇشىن – 27 321 تەڭگە, ال التى بالا ءۇشىن 23 629 تەڭگەنى قۇرايدى.