«Tipti kúlkili»: depýtat «Altyn alqa» úshin beriletin járdemaqy mólsherin qatań synady

Foto: parlam.kz

Májilis depýtaty Gaýhar Tanasheva Premer-mınıstr Oljas Bektenovten «Altyn alqa», «Kúmis alqa», «Qola alqa» ordenderimen marapattalǵan analarǵa járdemaqy mólsherin kóterý jaıly depýtattyq saýalǵa tolyqqandy jaýap berýdi surady dep habarlaıdy Qaz365.kz.

Búginde elimizde 583 myńnan astam kópbalaly otbasy tirkelipti. Onyń ishinde 90 paıyzy 4 jáne 5 bala tárbıelep otyrǵan otbasylar sany – 525 myń.

Depýtat Tanasheva osy otbasylardy mazalaıtyn eń basty problemany atap ótti.

Eger úlken balalary 18 jasqa tolǵannan keıin oqý oryndaryna túse almasa, ondaı jaǵdaıda kópbalaly otbasylar járdemaqydan da, basqa memleket tarapynan beriletin kómekten de aıyrylatynyn aıtady.

«Kópbalaly analarǵa arnalǵan memlekettik nagradalar men jeńildikterdi qazirgi ýaqytta biz qaıtadan qarastyrýymyz kerek. Bul bastamanyń negizgi maqsaty – kópbalaly analarǵa arnalǵan marapattardy jańartý jáne olardyń zamanaýı qoǵamda laıyqty qurmet pen qoldaýǵa ıe bolýyn qamtamasyz etý» – deıdi depýtat.

Gaýhar Tanasheva atalmysh máselege baılanysty úsh usynys jasalǵanyn málim etti.

«Úkimet tarapynan joǵaryda atalǵan problemalyq suraqtar boıynsha jáne byltyrǵy jarııalanǵan depýtattyq saýalǵa tolyqqandy, barlyq talap boıynsha jaýap berýdi suraımyz», – deıdi Gaýhar Tanasheva.

Depýtattyń sózinshe qazirgi «Altyn alqa» jáne «Kúmis alqa» ordenderi úshin járdemaqy mólsheri tipti kúlkili: jeti bala úshin – 27 321 teńge, al alty bala úshin 23 629 teńgeni quraıdy.