تىركەۋ مەرزىمى ءوتتى: قازاقستاندا كىمدەردىڭ تەلەفونى بۇعاتتالادى

فوتو: freepik.com

بۇگىن, 25 شىلدەدە قازاقستاندا مىندەتتى تەكسەرۋدەن وتپەگەن قۇرىلعىلار بايلانىستان اجىراتىلا باستايدى, دەپ جازدى qandastar.kz

ۇيالى تەلەفوندار ساتىپ الۋ كۇنى مەن قانداي جاعدايدا ساتىپ العانعا بايلانىستى وشىرىلەدى.

بۇل تۋرالى Stan.kz اقارات اگەنتتىگى «ينفورمبيۋرو» باعدارلاماسىنا سىلتەمە جاساپ حابارلايدى.

مەملەكەتتىك ورگاندار مەن بارلىق مۇددەلى تاراپتىڭ قاتىسۋىمەن وتكەن جيىندا 25 ماۋسىمعا دەيىن جۇمىس ىستەپ تۇرعان قۇرىلعىلاردىڭ جەلىگە قول جەتىمدىلىگىنە توسقاۋىل قويماۋ تۋرالى شەشىم قابىلداندى. دەمەك مۇنداي تەلەفوندار تەكسەرىلگەن-تەكسەرىلمەگەنىنە قاراماستان ءموبيلدى جەلىلەردە جۇمىسىن جالعاستىرا بەرەدى.

«جيىنعا قاتىسقانداردىڭ بارلىعى تىركەلمەگەن, بىراق 2025 جىلعى 25 ماۋسىمعا دەيىن پايدالانىلعان ۇيالى بايلانىس قۇرىلعىلارى اۆتوماتتى تۇردە زاڭداستىرىلادى دەگەن قورىتىندىعا كەلدى. ولار وشىرىلمەيدى», – دەيدى ەۋرازيالىق تۇتىنۋشىلار وداعىنىڭ باسقارما توراعاسى سۆەتلانا رومانوۆسكايا.

تسيفرلىق دامۋ مينيسترلىگى بۇل اقپاراتتى راستادى. بيزنەس ءۇشىن وتپەلى كەزەڭ 25 مامىردا اياقتالدى — كومپانيالار ساتىلماعان تەلەفونداردى الدىن الا تىركەۋگە مۇمكىندىك الدى. بىراق قاراپايىم پايدالانۋشىلار ءۇشىن مىنا نارسە ماڭىزدى: ەگەر ۇيالى تەلەفون جەلىگە العاش رەت 25 ماۋسىمنان كەيىن قوسىلعان بولسا, ول «سۇر تىزىمگە» ەنگىزىلەدى. دەمەك, ۇيالى تەلەفون يەسىنىڭ قۇرىلعىنى تىركەۋگە ءبىر اي ۋاقىتى بولعان. ەگەر تىركەپ ۇلگەرمەگەن بولماسا, ۇيالى تەلەفونى ءوشىپ قالۋى مۇمكىن.

«جەكە تۇلعالارعا 25 ماۋسىمعا دەيىن ءوز بەتىنشە تەكسەرۋدەن ءوتۋ ءۇشىن قۇرىلعىلاردى زاڭداستىرۋعا ۋاقىت بەرىلدى. جەلىگە قوسىلعان كەزدە تەكسەرۋدەن وتپەگەن قۇرىلعى «سۇر تىزىمگە» ەنگىزىلەدى. مۇنداي قۇرىلعىلاردى تەكسەرۋ ءۇشىن 30 كۇن بەرىلەدى. قۇرىلعى بەلگىلەنگەن مەرزىمدە تەكسەرۋ راسىمىنەن وتپەسە, ول «قارا تىزىمگە» كىرەدى», – دەلىنگەن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى حابارلاماسىندا.

بايلانىس اياسىنان تىس قالماۋ ۇشىن پايدالانۋشىلارعا تەلەفونىنىڭ IMEI كودىن الدىن الا تەكسەرۋ كەڭەس ەتىلەدى – ونى egov.kz, kz-imei.kz نەمەسە imei.rfs.gov.kz سايتتارىندا جىلدام ءارى تەگىن تەكسەرۋگە بولادى. ال ەگەر ءسىز جاڭا تەلەفون ساتىپ الىپ جاتقان بولساڭىز, مىندەتتى تۇردە ساتۋشىدان IMEI كودىن سۇراپ, ونىڭ تىركەلگەنىنە كوز جەتكىزىڭىز. ماماندار مۇنداي تەكسەرۋ تەك قاۋىپسىزدىك ءۇشىن عانا ەمەس, زاڭسىز اكەلىنگەن «سۇر» قۇرىلعىلاردان قورعانۋ ءۇشىن جۇرگىزىلىپ جاتقانىن ايتادى.